Presidente di Mexico, Andrés Manuel López Obrador, y e mandatario di Merca, Donald Trump, a sostene un reunion na Despacho Oval, pa despues ambos ofrece un mensahe pa e medionan di comunicacion y firma un Declaratorio Conhunto.
“T-MEC ta marca inicio di un etapa nobo cu lo beneficia trahadonan, agricultor, ingeniero y empresario di ambos pais, cu ta e columna di nos economia integra. T-MEC lo permiti cu nos relacion economico exitoso – esun di mas fuerte na mundo – lo expande ainda mas den proximo añanan, pa asina continua nos historia grandi cu cooperacion comparti”, e declaratorio cu e presidentenan di Mexico y Merca a firma ta bisa.
López Obrador y Trump a sali na Rose Garden unda tabatin planea prome e Firma di Declaratorio Conhunto y despues e mensahe pa medionan, sinembargo, a cambia e orden di e eventonan.
E presidente Mericano tabata esun cu a tuma e palabra prome y a gradici su homologo Mexicano pa eligi Merca como e prome pais pa haci su bishita, desde cu el a asumi e presidencia.
Di su parti, López Obrador a celebra e encuentro y a sigura cu ‘ambos nacion a opta pa marcha hunto pa un porvenir’.
E mandatario Mexicano a indica cu maske ainda ta existi ‘dañonan cu no lo lubida’, por yega na un acuerdo di cooperacion y un bon vecindad.
Durante su discurso, Trump a referi pa e Mexicanonan cu ta biba na Merca bisando cu ‘nan ta enrikece nos diversidad cultural’, y a afirma cu e bishita di presidente López Obrador a hiba ‘na otro nivel’ e relacion entre e paisnan.
