(France24) – For di mainta trempan di diadomingo ultimo, manifestantenan a reuni na diferente punto den centro di Ciudad di Mexico pa expresa nan rechaso pa iniciativa promovi pa e mandatario, Andres Manuel Lopez Obrador, cu ta propone, entre otro, e eleccion di huesnan pa medio di voto popular.

Gritando “Sin poder hudicial, ken ta bay proteha bo?” y “Poder Hudicial no ta bay cay” borchinan manera “Ta falso cu e votacion a duna e 4T (di cuater transformacion) e poder pa reforma Constitucion”, e manifestantenan a cuminsa e caminata pa e instalacionnan di Senado , unda legisladonan lo reuni despues pa aproba e reforma.

Manifestantenan a indica cu nan a asisti na e marcha pa presiona senadornan Mexicano pa no aproba e reforma, cu a obtene aprobacion di Camara di Diputado diaranson ultimo.

Entre e manifestantenan, por a mira algun politico y tambe un grupo di e Facultad di Derecho di e Universidad Nacional Autonomo di Mexico (UNAM), kendenan cu gritonan di “Poder Hudicial ta wanta, UNAM ta lanta para” a mustra nan desacuerdo cu e proposicion.

Loli, un di e manifestantenan, a señala cu e tabata na e protesta pasobra e kier libertad pa Mexico y a pidi e senadornan cu a papia contra e iniciativa pa “sigui ta fuerte, pa sigui ta honesto.”

Un otro di e manifestantenan, cu a omiti su nomber, a bisa cu loke nan ta buscando ta “pa purba evita e indignacion cu ta bay wordo cometi den e proximo dianan” si lo aproba e reforma pa motibo cu e ta considera cu esaki ta conduci na “basicamente regimen totalitario.”

“E ta parti di un proyecto politico totalitario, e no ta solamente vengansa, e ta e manera pa por realisa e proyecto ey sin contrapeso, antidemocrata”, el a conclui.

E reforma di e Poder Hudicial a causa varios protesta na Mexico, incluyendo un welga na Corte Supremo di Husticia di e Nacion (SCJN), tambe marchanan di studiante contra e iniciativa cu a pone cu e legisladonan a realisa e sesion den un luga alterno, ya cu acceso na e Palacio Legislativo a ser blokia pa manifestantenan.

Di otro banda, un grupo di hoben studiante universitario na fabor di reforma hudicial tambe a marcha den sosten di e iniciativa presidencial.

E studiantenan tabata carga borchinan cu ta mustra e salarionan di ministernan di Corte Supremo di Husticia di Nacion (SCJN), aunke nan a exclui ministernan manera Lenia Batres, Yasmín Esquivel y Loreta Ortiz, tur cerca di e Movemento Nacional di Regeneracion (Morena) na mando.

E accionnan aki na fabor di e reforma a genera choke cu esnan cu ta opone esaki ya cu un grupo di manifestante contra e iniciativa a ranca borchi y a insulta e hobennan cu ta sostene e proposicion cu a cuminsa trata den Senado diadomingo atardi.

Senado a cuminsa un periodo nobo di sesion, cu 85 di e 128 asiento den man di e aliansa di tres partido di e partido na mando, pues nan ta rekeri solamente un voto mas pa yega na e mayoria cualifica, dos tercera parti di e camara superior. pa modifica e Constitucion.