Presidente di Mexico Andres Manuel Lopez Obrador, ayera a laga e posibilidad habri cu su Gobierno por reconoce presidente interino di Bolivia, Jeanine Añez, di ken e ex-presidente Boliviano Evo Morales, cu ta na Mexico cu asilo, ta afirma cu e ta lider di un “gobierno de facto”.
Durante su conferencia di prensa, Lopez Obrador a ser interoga pa un periodista, si su gobierno lo sigui sin reconoce Añez como presidente di Bolivia.
“E ta un proceso, kiermen, ta studia e posibilidad. Esaki ta coresponde na Secretaria di Relacion Exterior pa balora na su momento. Asina otro paisnan ta haci, nan no a resolve. Mi no sa cuanto a reconoce of no a reconoce. Nos tin cu tuma nos tempo y na su momento lo tuma un decision,” el a sigura.
Diaranson pasa, gobierno di Mexico a expresa cu, pa e Doctrina Estrada, cu ta goberna politica exterior di e pais, no mester duna “reconocimento” na gobiernonan stranhero.
Secretaria di Relacion Exterior (SRE) a comparti un “texto integro” di e Doctrina Estrada, cu ta señala cu “Mexico no ta pronuncia su mes den sentido di otorga reconocemento, pasobra ta considera cu esaki ta un practica denigrante”.
“Como consecuencia, gobierno di Mexico ta limita na mantene o retira, ora e ta kere oportuno, su agentenan diplomatico y ta continua aceptando ora tambe ta considera oportuno e agentenan diplomatico similar cu e nacionnan tin acredita na Mexico,” e documento ta señala.
Diamars pasa, e senador Jeanine Añez, di partido Unidad Democrata, a asumi como presidente interino di Bolivia, dos dia despues di renuncia di Evo Morales, cu awor tin asilo politico na Mexico.
