(DW) – Ayera diahuebs Gobierno di Mexico a presenta un demanda contra Ecuador na Corte Internacional di Husticia na Den Haag pa asalto di embahada Mexicano na Quito, Ecuador, diabierna di siman pasa, segun canciyeria a informa.
E dia ey, forsanan policial a drenta na sede diplomatico pa captura e ex-vicepresidente Ecuatoriano Jorge Glas, ken a ricibi asilo politico di Mexico.
“Nos demanda ta contra Estado di Ecuador, no contra ni un persona den particular,” e canciyer Mexicano, Alicia Barcena a comenta. E obhetivo cu ta persigui ta pa haya “e suspension di Ecuador como integrante di Organisacion di Nacionnan Uni mientras no lo emiti un disculpa publico reconociendo violacion di principionan y normanan fundamental di derecho internacional, cu e fin di garantisa e reparacion di e daño moral causa na Estado Mexicano y nan compatriotanan,” e minister a agrega.
Presidente Mexicano, Andres Manuel Lopez Obrador, den mesun conferencia di prensa a bisa cu loke ta busca “ta pa no lo ripiti esaki na ni un pais di mundo, pa garantisa derecho internacional, pa no viola embahada di ningun pais di ningun nacion.” El a bisa, ademas “no tin duda cu Ecuador a viola Convencion di Viena tocante relacion diplomatico ora a viola inmunidad di embahada,” Alejandro Celorio consultor huridico di canciyeria Mexicano a señala.
Mexico ya caba a kibra relacionnan cu Quito, pero esey no ta e unico respuesta na loke a pasa. Secretaria di Relacionnan Exterior tambe a adverti cu a suspende e negociacionnan di e tratado di libre comercio exterior cu Ecuador, cu tabata busca un acuerdo pa drenta den Aliansa di Pacifico, e bloki comercial cu tambe ta integra pa Colombia, Chile y Peru.
“A nos si a suspende e relacionnan comercial cu Ecuador, den sentido cu nos tabata negociando un tratado di libre comercio y e conversacionnan ey a keda suspendi,” Barcena a manifesta y a agrega cu Gobierno di Mexico ta analisa presenta un denuncia penal na Ecuador pa entrada na su embahada y agresion na su personal diplomatico.
Acusacion penal lo ta basa den imagennan graba cu camaranan di siguridad di e luga, na unda diabierna di siman pasa Polis a bula e cura, a drenta bao forsa y a apunta e hefe di canciyeria cu un arma di candela pa despues somete e personal diplomatico y bay cu e ex-presidente Jorge Glas cu te ainda ta deteni.
E asalto aki a causa indignacion na nivel internacional y e condena di e pais sur Americano na unda gobiernonan regional a uni na fabor di Mexico pa motibo cu segun derecho internacional, embahadanan ta ser considera como teritorio soberano di e pais e cual nan ta representa.
