A pesar di cu Ford y General Motors a cancela algun di nan inversionnan na Mexico, diabierna pasa dirigente di ambos empresa a reuni na Michigan cu e secretario (ministro) di economia di Mexico, Ildefonso Guajardo, unda nan a papia di e futuro di e Tratado di Liber Comercio di Norte (NAFTA).
Guajardo a biaha pa Detroit pa informa di e plan cu Mexico tin pa “modernisa” NAFTA, cu presidente Trump kier renegocia, y pa combersa cu lidernan di e industria di auto, manera Ford, GM, Nexteer y BorgWarner, tocante e beneficionan cu nan tin cu e acuerdo comercial. Secretaria di Economia no a duna tanto detaye di e encuentronan, e prome di nivel halto despues di e anuncio di e companianan cu nan ta cede bao di presion di Trump pa mantene nan liñanan di produccion na Merca.
E secretario di Economia a participa diabierna na un evento organisa pa e Club Economico di Detroit (DEC) y dilanti empresario di e ramo di auto y di piesa di auto, a recorda nan cu 72% di e inversionnan na Mexico ta bin di Merca. “A traves di e produccion conhunto nos a bira mas competitivo contra otro region,” segun e mandatario. Mexico ta tratando di gana e confianza atrobe di e industria di auto di Merca, y di otro pais. E secretario a enfatisa cu danki na NAFTA e industria di auto a lanta como pilar di e relacion economico entre Mexico y Michigan. Guajardo a sigura tambe cu Mexico ta cla pa renegocia e tratado, aunke nan lo no acepta e proposicionnan di Trump pa cu impuesto na frontera. “Habri e caha di Pandora di e tarifanan di importacion lo ta un wega sin final, y lo conduci na un situacion den cual tur dos pais lo perde”.
“Mexico ainda ta e principal socio comercial di Merca, danki na NAFTA, un acuerdo cu a logra un intercambio comercial di un miyon dollar cada minuut”, segun cifra cita pa presidente Enrique Peña Nieto (como 500.000 miyon pa aña). E fabricantenan di auto cu ta ser menasa pa e medidanan di Trump ta inclui mayoria di e marcanan grandi, manera Ford, GM, Chrysler/FIAT, Honda, Nissan, Toyota, Mazda, KIA, Volkswagen.
