Ayera dialuna Gobierno Mexicano a revela cu lo investiga agentenan di Instituto Nacional di Migracion (INM) pa via di sospecha cu algun di nan ta involucra den e masacre di 22 di januari na e parti nort di e pais, na unda 19 curpa kima a aparece, entre nan di nacionalidad Guatemalteco.
Secretaria di Gobernacion, Olga Sanchez Cordero a anuncia e investigacion despues cu a revela pa prensa cu un pickup a aparece den e zona di e crimen na estado di Tamaulipas, cu prome tabatin seguro di INM na e localidad bisiña di Nuevo Leon.
“Tur esaki ta wordo investiga, nos ta bay wak si tambe algun di e funcionario of sirbido publico di e mesun Instituto Nacional di Migracion tin algun responsabilidad, esey ta un tema”secretaria a comenta na un conferencia di prensa na Palacio Nacional.
E aparicion di 19 curpa kima a causa conmocion na Mexico desde 22 di januari ultimo, ora un yamada anonimo a bati alarma pa autoridadnan di Tamaulipas riba dos pickup bandona y kima na un caminda di municipio di Camargo, na unda tabata e curpanan.
Fiscalia di Tamaulipas diadomingo ultimo a confirma cu dos di e curpa ta di ciudadanonan Guatemalteco y otro dos di Mexico, aunke autoridadnan di Guatemala ta sospecha cu e mayoria di victimanan ta migrante di e comunidad di Comitancillos y San Marcos.
E testimonionan cu a wordo recogi ta señala cu diabierna 22 di januari a drenta un comando cu personanan arma di e Cartel del Nordeste (CDN) pa busca un mando di e rival Cartel del Golfo (CDG), e organisacion criminal cu ta controla Tamaulipas.
Despues di un enfrentamento entre sicarionan di CDN presuntamente nan a busca e mando na tur e region y den un cas di Santa Anita nan a localisa 19 supuesto ciudadano Guatemalteco, pa ken nan a asesina y despues nan a bandona nan curpa na e limite di estado bisiña di Nuevo Leon.
