Di acuerdo cu rapportnan di e corant Argentino El Clarin y corant Mexicano El Milenio, 16 integrante di e mesun famia a muri di coronavirus, despues cu nan a asisti na e velorio di un familiar cu a fayece pa Covid-19, na Tultepec Mexico.
José Martín Chávez Enríquez a bisa pa El Milenio e tragedia cu a atravesa ora el a perde primonan, omonan y hasta su mama pa via di contagio cu Covid. Segun e medio Mexicano, e homber di 32 aña a splica cu na 2020 un omo di dje a muri di Covid y un gran parti di su famia a bay pa e velorio na un cas di e municipio bisiña di Cuautitlán Izcalli, sin sa e risico cu nan tabata core, y hopi pariente a wordo infecta cu e virus.
E reunion aki a resulta mortal pa 16 miembro di e famia, e mayoria di nan primonan, omonan y tambe su welo. “Mi no a haya chens ni di yora, mi ta manera den shock”, Chavez a splica, y a señala cu su mama a fayece pa e brote y cu su tata te ainda ta malo na su cas.
El a reconoce cu tambe a asisti na e velorio, pero e no a bira malo. “Danki dios, mi ta fuerte y mi a wak pa mi mama, pero e no a salba; mi tata ta den cama, y mi ruman muhe a recupera caba”, el a conta.
Jose Martin ken ta doño di un spa cu a wordo cera pa e pandemia, a indica cu el a dispone di su fondonan pa paga medico, oxigeno y medicina. “Mi a gasta como 80.000 peso, mi otro famia como 200.000 peso”.
Ayera diaranson, Mexico lo a mester ricibi, un miyon dosis di e vacuna di AstraZeneca, cu ta di Argentina, segun loke sub-secretario di Salud y estratega di Gobierno di Mexico contra Covid-19 Hugo Lopez-Gatell a bisa.
“Diaranson den oranan di marduga, nos a ricibi e prome cargamento cu tin aproximadamente 1 miyon dosis, ya cu pa via di e condicionnan di operacion di planta por tabatin un tiki menos”, Lopez-Gatell a comenta den un conferencia di prensa di coronavirus.
