Mexico ta detecta casi 1.4 miyon di migrante iregular

(DW) – Autoridadnan di Mexico a detecta casi 1.4 miyon di “persona den situacion migratorio iregular” entre januari y mei 2024, nan ta di 77 pais di e cinco continente, segun Instituto Nacional di Migracion (INM) a informa diadomingo ultimo.

Den un comunicado, e institucion a detaya cu –di acuerdo cu e procesonan migratorio- di 1,393,683 persona stranhero cu tabata biaha den e pais cu condicion iregular den e prome cinco luna di aña 2024, 738,270 homber adulto cu tabata transita nan so, mientras cu 362.979 tabata muhe adulto no acompaña.

“Por separa a ubica 154,291 adulto cu tabata biaha den nucleo familiar acompaña y 135,151 mucha, mientras cu a ser identifica 2.992 muchanan menor di edad no acompaña,” segun INM.

E pais principal di origen di e personanan migrante ta Venezuela, ta sigui Guatemala, Honduras, Ecuador, Haiti, Colombia, El Salvador, Nicaragua, Peru y Cuba. Ademas di Senegal, Guinea, Republica Dominicana, China, Brazil, Mauritania, India y Angola, entre otro. Asina mes, a agrega cu muchanan migrante no acompaña tabata for di Venezuela, Guatemala, Honduras, Ecuador, El Salvador, Colombia, Haiti y Nicaragua.

Den mesun siman di e rapport, presidente di Mexico Andres Manuel Lopez Obrador, a nenga cu tabatin un descontrol di fluho migratorio na e pais, despues di e medidanan anti migrante di Gobierno di Merca y e orden ehecutivo di Joe Biden, cu ta restringi e solicitud di asilo y a agilisa e deportacionnan.

Migracion iregular intercepta pa Mexico a triplica den e prome trimester di 2024 di hasta casi 360,000 persona memey di operativonan creciente, aunke Gobierno ta afirma cu e fluho migratorio a disminui.

Den aña 2024, a registra cu solicitud di asilo politico a cay 41,9% de hasta un total di 36,860, aunke migrantenan a denuncia cu esaki ta debi na dificultadnan legal pa e gestion di nan proceso na Comision Mexicano di Ayudo pa Refugiado (Comar).

Di acuerdo cu Gobierno di Mexico, for di januari hasta luna pasa, e peticionnan tabata di 26,576 menos cu 63,436 registra durante e mesun periodo di aña 2023, ora den henter aña tabatin un record di 140,982, un aumento di 18.2% y e di tres cifra mas halto na mundo despues di Merca y Alemania.

E nacionalidad cu ta mas ta solicita asilo politico na Mexico ta di Honduras, cu 15.389, ta sigui Cuba, El Salvador, Venezuela, Guatemala, Colombia, Nicaragua, Ecuador y Chile.