(Univision).- Polis federal a haci dos operativo na Toluca y Cuernavaca unda nan a rescata 30 muhe y a detene cuatro persona. E muhenan a ser contacta na nan pais di origen bao di promesa di trabao na Mexico y despues nan a kita nan documentonan di nan pa explota nan sexualmente.
Nan edad ta varia entre 21 y 39 aña. E delincuentenan tabata obliga nan cumpli cu trabao sexual diario bao menasa di golpea nan o haci daño na nan familiarnan. Nan a rescata nan entre otro na Toluca, den estado Mexico, unda polis a desarticula diasabra pasa un banda di delincuente dedica na trafico di persona, cu meta di explotacion sexual.
Comision Nacional di Seguridad a indica den un comunicado cu a efectua dos operativo: esun mas grandi tabata den un hotel na Toluca unda a rescata 24 muhe y a detene un homber di 40 aña y un muhe di 43 cu presuntamente tabata coordina e actividad ilicito dentro di e edificio.
Otro operativo a tuma lugar na Cuernavaca, tambe den e region central di e pais, unda a detene dos persona y a rescata cinco dama Venezolano y un Mexicano. Polis federal di Mexico a declara cu a desaroya un trabao di inteligencia durante varios luna prome cu a ehecuta e detencionnan, hustamente e dia riba cual tabata celebra na varios ciudad di mundo marcha contra violencia machista. Diezcuatro di e victimanan rescata na Toluca ta bisa cu nan ta di Colombia y otro diez di Venezuela.
Di acuerdo cu e investigacionnan, e muhenan a keda engancha pa enlace di e grupo delictivo den nan pais di origen, cu e promesa di un empleo, y una vez na Mexico nan tabata kita nan documentonan y tabata obliga nan prostitui nan mes, cu e menasa di haci daño na nan famia. E muhenan tabata pasa nochi na e hotel y tabata obliga di cubri un cuota diario di por lo menos cinco cliente; si nan no cumpli cu e minimo cu nan captornan a exigi, nan tabata golpea nan.
E muhenan a ser poni na disposicion di personal di fiscalia contra trafico di persona, mientras cu e dos detenidonan a ser aresta y presenta dilanti un huez di estado di Mexico.
