(AP) — Presidente Mexicano, Claudia Sheinbaum a bisa ayera cu e orden ehecutivo di presidente Donald Trump designando cartelnan di droga como organisacionnan terorista stranhero lo tin impacto riba Mexico solamente si tin coordinacion cercano entre e dos gobierno.
El a bisa cu Mexico lo defende su soberania y independencia mientras ta busca coordinacion cu Merca despues di e orden firma dialuna.
E orden di Trump a resalta cartelnan di droga Mexicano y otro gruponan criminal Latino Americano manera gang Venezolano, Tren de Aragua y gang Salvadoreño, Mara Salvatrucha (MS-13). E orden ta bisa cu nan “Ta menasa e seguridad di pueblo Mericano, seguridad di Merca, y stabilidad di orden internacional den hemisferio occidental.”
E orden no a lista nomber di ningun cartel Mexicano, pero a bisa cu secretarionan di Gabinete lo recomenda gruponan pa designacion como organisacion terorista den proximo 14 dia. Tabata entre un cantidad di orden ehecutivo cu Trump a firma dialuna pa inicia su administracion, varios di cual ta enfoca riba seguridad di frontera sur.
No tabata cla kico e impacto lo ta pa bringa e cartelnan, pero tabatin preocupacion cu lo por ta otro manera pa haci mas dificil pa hendenan di e paisnan unda e gruponan ey ta opera haya acceso na Merca.
El a yega ademas di medidanan incluyendo e declaracion di un emergencia na frontera sur di Merca, un promesa pa impone tarifa di 25% riba Mexico y Canada riba dia 1 di februari y terminando e uso di e app CBP One, cu tabata permiti migrante aplica pa cita di asilo prome cu alcansa e frontera.
Trump tambe a priminti di ehecuta deportacionnan masal y menasa intervencion na Mexico pa combati cartel, algo cu Sheinbaum a rechasa di manera skerpi. Hopi a expresa preocupacion cu e designacion terorista lo por duna Merca hustificacion pa tuma accion militar contra cartel.
