Despues di añanan di lucha civico y legal, diputado Mexicano ta dispuesto pa aproba un proyecto cu lo legalisa marihuana cu fin recreativo y Mexico lo por bira un mercado grandi.

E iniciativa, cu tambe ta busca regula empleo cientifico y industrial di cannabis, lo wordo vota na Camara Baha despues cu a wordo respalda na Senado na luna di november ultimo.

Ta trata di un señal pa Mexico, na unda violencia di narcotrafico cada aña ta laga miles di morto.

“E ley aki lo permiti auto cultivo, cultivo comunitario, a traves di cooperativanan y finalmente e produccion nacional” activista Genlizzie Garibay, conoci como “Polita Pepper” a splica.

Sinembargo, e texto lo por bay back na Senado pa un nobo votacion, pa motibo cu diputado a modifica gran parti di e contenido. Oficialismo di iskierda ta domina ambos Camara.

E proposicion ta mantene elementonan como e cantidad di gram cu un persona por tin cune cu ta 28 gram pa cada persona, ademas di permiti e cultivo casero di maximo ocho planta.

Tambe ta dispone cu muchanan menor di 18 aña no por tin acceso na cannabis y ta prohibi su consumo na areanan di trabou of oficina.

Entre e modificacion ta destaca e negacion di diputado pa crea un instituto regulado di mercado, como Senado a propone. E responsabilidad lo cay riba Comision Nacional contra Adiccion (CONADIC), di ministerio di Salud.

Mexico, cu 126 miyon habitante, lo por bira asina den mercado di marihuana mas grandi na mundo, considerando ademas cu 12 di januari ultimo e gobierno a reglamenta su uso medicinal.

Sinembargo, activistanan ta alerta cu e norma ta mantene criminalisacion di consumo di cannabis, cu lo sigui den e lista di substancia prohibi pa Ley di Salud Mexicano, y considera un acto ilegal e posesion di mas di 28 gram cu ta e cantidad autorisa.

“E produccion lo ta legal, e benta tambe, pero posesion te ainda lo ta suheto na menasa di uso policial, multa y posibel detencionnan” Lisa Sánchez, director di ONG México Unido Contra Delincuencia a sostene.

Segun e, si e norma ta habri posibilidad di crea un cadena di balor, e persecucion lo sigui riba usuarionan y productornan chikito.