(AFP) – Mexico a bisa diahuebs cu e kier haya trato preferencial si Presidente di Merca, Donald Trump, sigui cu tarifanan halto riba auto, y a priminti un “reaccion completo” na e medidanan di Washington.
Presidente Claudia Sheinbaum a bisa cu e tarifanan ta bay contra e acuerdo di comercio liber di Norte America, cu a stimula grandemente e industria automotriz di Mexico, un pais caminda hopi planta automotriz stranhero ta operando.
“Naturalmente, no mester tin ningun tarifa den e acuerdo di comercio USMCA (Estados Unidos-Mexico-Canada). Esey ta e esencia di e acuerdo,” el a bisa durante un conferencia di prensa.
Diahuebs, Trump a anuncia un tarifa di 25% riba tur auto cu no ta produci na Merca como parti di un guerra comercial amplio contra tanto socio y competencia, cu segun e ta destina pa combati “practicanan inhusto”.
“Si nos ta move pa un sistema cu tarifanan asina halto, nos tin cu busca un trato preferencial pa Mexico,” minister di Economia di Mexico, Marcelo Ebrard, a bisa.
Esey lo permiti e pais Latino Americano pa “proteha nos trabao y e actividad economico di Mexico,” el a agrega, durante un yamada via video for di Washington, caminda e tabata reuni cu oficialnan halto di Merca,
Sheinbaum a bisa cu Mexico lo warda te principio di april — ora cu Trump a priminti tarifanan reciproco adapta pa cada socio comercial — prome cu duna un “reaccion completo”.
“Esey no ta nifica cu e porta pa traha hunto cu Merca ta cera,” el a bisa.
Sheinbaum a expresa na mas di un ocasion su speransa cu tarifanan riba producto Mexicano por ser evita, y Trump ya a duna Mexico alivio for di tarifanan dos biaha, cu ta para pa vence na inicio di april.
Mexico a reemplasa China den 2023 como e socio comercial mas grandi di Merca, cu su cu bisiña Norte Americano cumprando mas cu 80% di su exportacionnan.
Mexico ta exporta casi tres miyon auto pa Merca anualmente — incluyendo auto y trucknan arma pa companianan Mericano — y e sector di auto ta genera rond di 5% di e producto bruto nacional.
Ebrard a bisa cu, segun e Cas Blanco (White House), e auto cu tin algun componente traha den Merca por cualifica pa tarifanan mas abou.
Mexico tambe a haya garantia cu productonan no lo ser someti na tarifanan repetitivo si nan pasa frontera varios biaha durante e proceso di fabricacion, el a bisa.
Pa calma e preocupacion riba e economia Mexicano den cara di e menasa di tarifanan, Sheinbaum a invita algun director di empresa pa su conferencia di prensa pa presenta nan plan di inversion.
Diahuebs, e gran cadena di supermercado Americano Walmart a bisa cu nan lo inverti mas cu $6 biyon den Mexico e aña aki, creando varios mil trabou.
