(NTN24/AFP) – Congreso di Mexico a aproba ayera un ley polemico cu ta regula participacion di militar den e combate contra crimen organisa, a pesar di e oposicion di defensornan di derecho humano.
Despues di visto bueno di Senado algun ora prome, Camara di Diputado a ratifica asina yama Ley di Seguridad Interior cu 262 voto na fabor, 25 contra y cero abstencion. E senadornan Mexicano, despues di un debate largo, a aproba e ley cu 76 voto na fabor, 44 contra y 3 abstencion. Awor e ley mester keda promulga pa presidente Enrique Peña Nieto.
E ley ta trata di cubri un bashi legal di mas di 10 aña, genera pa e decision di gobierno Mexicano di lansa na final di 2006 un ofensiva militar controversial antidroga, cu a pone militar complementa tarea di polis y cu a bin acompaña pa un escalada di violencia.
E opositornan di e ley ta argumenta cu esaki ta perpetua un medida di excepcion cu a afecta derecho humano na Mexico y cu ta pone un banda e necesario fortalecimento di e cuerponan policial.
E senadora di Partido Revolucionario Institucional (PRI), Cristina Díaz, actualmente na poder, a descarta cu lo ta “intencion di gobierno pa militarisa e pais” y tampoco cu e forsanan arma ta asumi tarea di seguridad di manera permanente, segun un comunicado di Senado.
Alto Comisionado di ONU pa Derecho Humano, e ombudsman Mexicano y e Comision Interamericano den e materia a haci yamado e siman aki na Congreso pa no aproba e ley.
Academico, politico di oposicion y voznan di sociedad civil tambe a protesta y expresa nan temor cu e ley por haci violencia na Mexico mas grave.
Desde 2007 te cu e fecha aki, mas di 196.000 persona a muri asesina na Mexico y 30.000 ta desapareci, segun cifra oficiale cu no ta precisa cuanto caso ta relaciona cu criminalidad, segun AFP.
