(DW) – Diadomingo 28 di april, e candidatonan presidencial di Mexico, oficialista Claudia Sheinbaum y opositornan Xochitl Galvez y Jorge Alvarez Maynez, a ofrece un di dos debate den cual a sali acusacionnan mutuo, como por ehemplo “forma parti di narco partidonan.”

E dos faborito, Sheinbaum y Galvez, a intercambia palabranan directo y a laga atras e frialdad y rigidez di su prome cara a cara den marco di e campaña electoral pa eleccion presidencial di 2 di juni.

Opositor Galvez a cuminsa cu un atake frontal contra Sheinbaum y a saca den su cara e ola di violencia cu Mexico ta bibando den relacion cu crimen organisa y gruponan narcotraficante aunke e enfoke di e tema tabata di economia.

“E delincuentenan ya tin partido caba (gobernante Movimiento di Regeneracion Nacional) Morena a bira un narcopartido,” el a sigura.

“E brasanan pa delincuentenan a caba,” e opositor a bisa haciendo referencia na e lema di “brasanan y no balanan” utilisa pa e presidente actual, Andres Manuel Lopez Obrador, pa defini su politica di siguridad cu ta busca apunta e causanan di violencia y no represion.

Sheinbaum a contesta lihe indicando cu “e unico narcogobierno declara cu a existi ta esun di ex-presidente Felipe Calderon (2006-2012) di Partido Accion Nacional (PAN), partido cu ta forma parti di e coalicion lidera pa Galvez.

Debi na e bentaha amplio cu Sheinbaum ta mustra den encuestanan, Galvez a dicidi insisti riba e criticanan pa e oficialista pa su falta di independencia y a acusele di ta bao control di Lopez Obrador, ken a yega na poder na 2018 y ta bay laga su funcion na october di e aña aki.

“Claudia ta e candidato di e mentiranan,” e opositor a afirma.

Den sentido ey, a probecha e polemica actual di e mal calidad di awa na Ciudad di Mexico y a saca un boter di e likido contamina y a desafia Sheinbaum pa bebe un tiki di dje.

Di su parti, durante tur e debate. Sheinbaum a evita referi na su rival pa su nomber y a limita di dirigi na dje como “e candidato di PRIAN” den referencia na e suma di partidonan tradicional Mexicano di e Partido Revolucionario Institucional (PRI y PAN).

“Mi a bisa boso caba cu e ta bay papia calumnia: honestidad,” el a bisa.

E ex-hefe di Gobierno di Ciudad di Mexico a insisti den e logronan di e presidente Lopez Obrador y a priminti continua e agenda di e mandatario actual.

Aunke e candidatonan ta tres, e debate a caba como un confrontacion casi exclusivo entre Sheinbaum y Galvez, ya cu e di tres candidato, Alvarez Maynez, di opositor Movimiento Ciudadano, a keda manera bandona den un skina.

Apenas el a logra inclui referencianan na un pais multicultural den cual “Spaño no ta e unico lenga” y na unda energia renobable mester ta clave pa desaroyo economico di e pais. El a caba su intervencion lesando un lista di deseonan y peticion politico di si yiu di cinco aña.