(El Pais) – Secretaria di Salud di Mexico a emiti un alerta epidemiologico pa deteccion di casonan di sarampi, e dependencia federal a haci un yamada na tur centro di salud pa vigila e posibel contagionan y tuma medidanan pa evita “e reintroduccion di e virus.”
Sarampi ta un malesa viral hopi contagioso, segun loke secretaria ta enfatisa, a confirma caba cuatro caso y nan ta analisando 855 mas. Te ayera, pashentnan confirma ta “casonan importa,” pa loke e dependencia ta busca evita cu lo origina un contagio local.
E prome caso di sarampi na Mexico pa e aña aki a ser identifica dia 14 di maart, tabata trata di un mucha di un aña y ocho luna, cu nacionalidad Rumano y residente na Hungria, cu den ultimo lunanan a biaha pa Francia y Gran Bretaña prome cu lo a yega na Ciudad di Mexico. A realisa e deteccion di e malesa na mesun aeropuerto di e capital, na unda e mama a referi cu e sintomanan a cuminsa un dia prome. Despues di e confirmacion di e diagnostico di sarampi, Gobierno a cuminsa e protocol di respuesta rapido, pero den siguiente dianan a identifica tres caso nobo.
Den e vuelo di London pa Mexico tambe a contagia un adulto Mexicano cu nunca a haya vacuna contra sarampi, otro di origen stranhero –di e cual autoridadnan no a duna detayenan- y un baby Britanico, di seis luna cu no por a ricibi e dosis sino te ora e lo cumpli un aña.
“Sistema Nacional di Vigilancia epidemiologico di Mexico ta continua e siguimento di tur e contacto pa identifica di manera lihe si ta presenta sintomanan, loke ta permiti haya e casonan importa, y establece accionnan inmediato pa limita e cadenanan di transmision,” Secretaria di Salud a señala dia 6 di april ultimo.
Siman aki e dependencia a emiti un “aviso nobo pa tur unidad medico di prome, segundo y di tres nivel di atencion debi na deteccion di casonan importa di sarampi,” ademas a enfatisa na centronan medico pa sigui e protocolnan, a recorda na famianan e importancia di vacuna e muchanan contra e malesa aki “cu e proposito di evita cu lo registra mas casonan local di sarampi na e pais.”
Na nivel global, aumento di casonan di sarampi ta di mas di 3.000% na Europa y Asia Central, segun ultimo datonan di Organisacion Mundial di Salud. Entre januari y december 2023 a constata 30.601 positivo, compara cu 938 di aña 2022. Unicef, organismo di Nacionnan Uni pa infancia, a adverti cu esaki ta debi na caida di vacunacion, cu te pandemia a bin aumentando su numbernan. Mexico ta considera un pais na unda sarampi ta elimina, di parti di e organisacionnan aki, p’esey Secretaria di Salud ta indica cu “ta importante pa mantene e clasificacion di detecta casonan oportunamente y mantene e personanan vacuna.”
