Dos siman pasa, sargaso a regresa na e beachnan di Caribe Mexicano, y su invasion a lanta e pio temor di e empresarionan di sector, politico, local… y turista cu su vacacion paga caba.
Ainda pio ta pa sa cu e yegada di e macroalga aki na e costa cristalino di Quintana Roo no tabata pasahero. Lo continua yega un siman pa otro, te alcansa un cifra cu lo por supera 1.000.000 di tonelada na 2019, e Red di Monitoreo di Sargaso na Cancun a calcula.
E dato a causa molestia pa e sector di hotel, cu desde 15 dia pasa, ta pasa e basora pa e oriya y ta paga cu fondonan priva e limpiesa di su costanan, pa no perturba e felicidad di su clientenan.
Desde cu e ‘oro di lama’ a inunda e motor turistico di Mexico, empresario, activista y politico regional a exigi pa gobierno federal implica den esaki. Na un bishita pa e Senado dialuna 29 di april, nan a demanda recurso para kita e sargaso cu ta extende na Tulum, Playa del Carmen, Riviera Maya, Playa Paraiso, Cancun y Cozumel, entre otro punto.
Den e conferencia di presidente di Mexico, Andres Manuel Lopez Obrador, diamars pasa, el a anuncia cu e Secretaria Marino ta elabora un strategia urgente urgente pa enfrenta e problema di sargaso na e Caribe Mexicano.
“Ta trahando di manera coordina. Nos ta pidi pa e Secretaria Marino (Semar) pa yuda nos. Nan tin ekipo, tin experiencia y lo resolve e problema aki. Tin tambe e coordinacion cu e gobierno municipal di Quintana Roo y e gobernador, ademas di empresarionan di e sector”, e mandatario a revela.
Aunke nan no lo contrata servicio di ningun otro empresa externo, si a aclara cu nan ta traha conhuntamente cu e sector priva, cu ta haci e esfuerso pa retira e alga di su beachnan pa no afecta e turistanan.
