Na Mexico ta existi 61.637 personanan desapareci. E sub-secretario di Derechonan Humano di Secretaria di Gobernacion, Alejandro Encinas a presenta dialuna ultimo un cifra oficial nobo di e personanan desapareci, 54% mas cu e 40.000 cu a reporta na 2018.
E reporte presenta pa Encinas ta inclui informe di desaparicion desde e añanan 60, aunke e parti mayor di e datonan ta coresponde pa e periodo di aña 2006, ora e guera contra narcotrafico a cuminsa.
E cifranan nobo ta un actualisacion despues di revisa e informe di fiscalia estatal y elimina e diferente base di datonan cu tin na e pais.
Esey a permiti pa haya hopi mas caso di denuncia pa desaparicion cu a clasifica di forma distinto. Tambe ta existi un subregistro.
Varios fiscalia no a entrega e informacion completo pa e Comision Nacional di Buskeda, organismo di gobierno federal cu ta atende e problema.
Ta un di e motibonan di aumento den e cifranan, e funcionario ta splica. Pero ademas, den e gobierno di e presidente Andrés Manuel López Obrador, e desaparicion di personanan ta atendi di forma distinto, Encinas a firma.
E cifra di personanan desapareci lo por varia, ta reconoce sub-secretario Encinas, pa motibo cu diesun di e 32 fiscalia di e pais no a termina di revisa y limpia e informacion.
Na prome aña di gestion di Lopez Obrador, a reporta 5.184 personanan desapareci, un cantidad menor compara cu dos aña prome. Na 2018, por ehempel, a registra 5.976 desaparecido oficial.
Jalisco, den occidente di Mexico, ta e estado cu mas reporte di persona no localisa cu 2.100 caso. Desde tres aña pasa, e entidad aki tin un pelea interno den e Cartel Jalisco Nueva Generacion (CJNG), un di e organisacionnan di narcotrafico mas fuerte di e pais.
Di acuerdo cu organisacionnan civil, hopi di e casonan di desaparicion di persona tin vinculo cu e pelea aki.
Pero ademas, Jalisco ta e estado den cual aña pasa a localisa e mayor cantidad di graf clandestino, e sub-secretario ta señala cu aña pasa a haya 873 di esakinan, den cual a descubri 1.124 curpa.
