Diahuebs gobierno di Mexico a rechasa cu nan ta e di dos pais mas violento rond di mundo, manera presidente di Merca, Donald Trump a sigura riba un mensahe na Twitter.
“Aunke Mexico tin un problema grandi di violencia, Mexico no ta e di dos pais mas violento di mundo,” Canciyeria di Mexico a bisa den un comunicado. E comunicado a splica cu pais manera Honduras, Venezuela, Belice, Colombia y Brasil, tin indice di asesinato mas halto compara cu e indice di Mexico. Canciyeria a splica cu “mercado ilegal di droga ta un causa di violencia na Mexico, y cu e problema lo caba, si nan ta purba di haya un solucion comparti y si ta gara e topico na su raiz: e demanda halto di droga for di Merca y e oferta desde Mexico (otro pais tambe),” ta un punto importante pa soluciona.
Diahuebs Trump a bisa riba Twitter cu Mexico ta califica como di dos pais mas mortal na mundo despues di Siria,” p’esey Trump a presenta di nobo su plan di construi un muraya entre e dos paisnan.
Gobierno di Mexico a responde cu “ora cu nos kier trece un solucion efectivo, mester stop di tira culpa riba un otro, y cu Mexico ta wardando pa traha cu Washington den combati tur droga ilegal.
E relacion entre e dos paisnan a bira hopi tenso desde cu Trump a priminti durante su campaña di construi un muraya na frontera, y cu esaki lo ser paga pa Mexicano. Trump tambe a papia di un posibel cambio den tratado di Comercio Liber di America di Norte (TLCAN)
