‘Nan ta mata nos y abo no ta haci nada’ of ‘Nan no ta cuida nos, nan ta viola nos’, ta loke algun di e pancarta cu cual centenares di manifestante na Ciudad di Mexico a reuni diabierna dia 16 di augustus ultimo pa exigi husticia den dos caso reciente di adolescente cu presuntamente a ser viola pa Polisnan.
Ta trata di e di dos marcha di e siman dilanti di e oficina di e Procuraduria General di Mexico, unda cu dia 12 di augustus tabatin un manifestacion similar, den cual casi 300 manifestante, den su mayoria muhenan, tabata kibra e porta di glas di e edificio.
Den un prome caso, un mucha muhe di 17 aña presuntamente a ser viola pa cuater Polis paden di un patruya dia 2 di augustus na Ciudad di Mexico. Segun e Fiscalia, e presunto agresor a ser deteni, mientras e investigacion tabata desaroya.
Procuraduria General a reconoce cu dia 13 di augustus e posibel personanan responsabel no a ser identifica. Loke a aumenta e indignacion y incertidumbre den e caso.
Supuestamente, e violacion a ser haci pa personanan cu uniforme di Secretaria di Siguridad Publico di e Ciudad di Mexico, na Alcaldia di Azcapotzalco.
Violencia contra hendenan muhe ta un problema persistente na Mexico, un pais catolico y conservador unda e concepto tradicional di genero ta profundamente estableci.
Na Mexico, entre januari y mei ultimo, mas di 1.100 muhe a ser asesina, segun cifranan di e Gobierno, cu casi 370 cu a ser asesina pa nan genero. Na Ciudad di Mexico so tin 80 asesinato di muhenan y 13 feminicidio den transcurso di e aña aki.
