Mexico a duna un paso mas pa legalisacion di marihuana, cu un proposicion pa crea un empresa publico cu lo tin e monopolio di comercialisacion di e mata aki.
Diamars pasa e coordinador di Morena na Camara di Diputado, Mario Delgado, a presenta un reforma cu ta inclui e creacion di un empresa estatal dedica pa e compra y benta di marihuana como tambe e posibilidad pa e Mexicanonan cultiva te seis mata na cas.
E lider di Morena a propone cu e empresa publico lo yama Cannsalud, y segun e proyecto, lo ta encarga di cumpra marihuana pa e productornan y lo bende pa e doñonan di e frankisia, pa nan haci mescos pa e publico general. Tambe e industria farmaceutico lo tin cu pidi e empresa nobo di Gobierno e elaboracion di medicina cu autorisacion. E proposicion di Delgado ta cana di acuerdo cu loke ta discuti den Senado, pero ta inclui un diferencia: no lo por consumi na luganan publico.
E mayoria di e partido Morena na ambos Camara lo permiti cu e reforma lo sigui bay dilanti sin complicacion durante un votacion cu lo realisa prome cu e luna termina. Entre hopi legisladonan ta existi e idea cu e legalisacion di cannabis lo por ta un negoshi beneficioso pa e arca publico, den e contexto mundial cu Mexico kier converti den un potencia. E ex-mandatario conservador Vicente Fox ta un di e impulsornan principal di e legalisacion, y a sigura cu e negoshi su beneficio ta scapa entre e dedenan di e man pa cada dia cu ta pasa sin un marco legal pa comercialisacion di marihuana.
Segun Morena, e partido di Presidente Andres Manuel Lopez Obrador, e propuesta di ley cu e partido mes ta impulsa, ta diseña pa pone e accento na salud, e derechonan humano y auto consumo.
