Presidente di Mexico ayera diamars a presenta na Camara di Senador un proposicion pa convoca un referendum pa consulta pueblo si kier pa investiga y, si ta e caso, castiga su cinco antecesor pa casonan di corupcion.
Den un principio, Andrés Manuel López Obrador lo tabata kier pa ciudadanonan pidi un consulta, pa locual tabata necesario 1.8 miyon firma (2% di e registro electoral), manera e ley ta marca, pero ora no tin tempo, pa motibo cu e plaso a vence 15 di september, su mes a presenta e iniciativa.
“Mi ta bay duna di conoce nos decision di entrega un escrito pa Camara di Senador pa realisa e consulta pa pueblo di Mexico riba e huicio posibel di ex-presidentenan di Mexico desde 1988 te fecha actual”, el a bisa.
E mandatario a afirma cu “ta hopi satisfactorio” cu miles di ciudadano a recoge firmanan pa solicita e referendum y a bisa cu tin informacion cu a logra recauda dos miyon di apoyo riba caya.
“En todo caso, pasobra awe e plaso ta vence, mi a considera importante pa presenta tambe e escrito aki pa tin mas siguridad riba e solicitud di e realisacion di un consulta pa tur ciudadano”, el a detaya.
Segun iniciativa presidencial, e posibel consulta cu mester ta respalda pa Legislativo y Corte Supremo di Husticia, lo tuma luga na 2021, den dos fecha posibel, 1 di augustus of 6 di juni, den coincidencia cu eleccionnan di Camara di Diputado y autoridadnan local.
Referendum a coy forsa despues cu na augustus un denuncia di e ex-director di e petrolero estatal Pemex a keda conoci, cu acusacionnan contra e ex-gobernantenan Enrique Peña, Felipe Calderon y Carlos Salinas.
