Dialuna cu a pasa polis di Mexico a haya seis cabes di humano riba dak di un auto y e resto di e curpanan tabata den e auto ey, cu a ser bandona na municipio di Chilpancingo, capital di estado di Guerrero, Gobierno di Mexico a informa. Cerca di un boulevard na ciudad di Chilpancingo, unda ta biba cerca di 187 mil habitante, autoridadnan a haya riba un auto “ un saco preto di plastic unda nan a haya seis cabes y den e auto aki tabata tin e curpanan,” Roberto Alvarez , vocero di seguridad di Guerrero a bisa den un comunicado.
Den otro informe, a relata cu dialuna autoridad a haya na Mexico e curpanan di 4 homber na municipio di Chilapa, situa na 60 kilometer di Chilpancingo. E cuatro curpanan cu autoridad a haya a ser maltrata pasobra nan tabatin nan man mara, mientras nan tabata presenta hueya di tortura, un fuente di gobierno di Guerrero a bisa bao condicion di anonimato. E crimen cu a ser reporta dialuna ta resultado di un “bringamento entre e cartelnan yama ‘Los Ardillos’ y ‘Los Jefes’, un fuente a bisa. E grupo ‘Los Jefes’ tabata conoci anteriormente como ‘Los Rojos’.
Gobierno a bisa cu Los Rojos tabata enemigo di e cartel Guerrero Unidos, cu a ser culpa como responsabel di e desaparicion di 43 studiante na september 2014 na Iguala y cu segun informacion oficial a ser asesina pa cartel Los Rojos, na un basurero, pa despues kima, garna y tira e restonan den un rio.
