(UnivisionNoticias) – Un periodista Mexicano, Gumaro Pérez, a wordo asesina diamars ultimo mientras e tabata atende un celebracion di Pasco na scol di su yiunan. E sucedido a tuma luga na Acayucan, na estado di Veracruz. Cu Pérez ya ta suma 12 periodista asesina na Mexico na 2017.
Segun confirmacion di Comision Estatal pa Atencion y Proteccion di Periodista, por lo menos dos homber arma a drenta den e klas di su yiu y a asesin’e dilanti di mayornan, maestro y alumnonan.
Gumaro tabata empleado di e Ayuntamiento Local, ademas di ta fundado y reportero di Portal La Voz del Sur. Na augustus pasa el a condena e asesinato di su colega Cándido Ríos.
Mexico ta un di e paisnan mas peligroso na mundo pa eherce periodismo, debi na e falta di boluntad politico pa caba cu e impunidad cu ta permiti gruponan criminal, funcionario corupto y cartel di droga silencia nan criticonan, segun un informe special di e organisacion internacional Committee to Protect Journalists (CPJ). Cu Pérez, tin 12 asesinato di periodista e aña aki, sin cu te na e momento aki a resolve un di e crimennan aki, di acuerdo cu un analisis realisa pa Univision Noticias, tumando na cuenta e cifranan oficial y dato di organisacionnan non profit.
Di acuerdo cu e ultimo informe di Reporteros Sin Fronteras, Mexico ta e pais “mas peligroso na mundo pa reportero.”
“Den e pais di e cartelnan di droga”, manera RSF ta referi na Mexico, “e periodistanan cu ta ocupa cu e corupcion di e clase politico o crimen organisa, ta keda casi sistematicamente señala, menasa o incluso ehecuta cu sanger friu.”
