Reconocemento pa nan trabou, esey ta e exigencia di 200 partera cu a reuni pa hala atencion di Gobierno Mexicano riba e necesidad di reconoce nan como parti di comunidad medico.
“Nos ta trahando riba e defensa di e parto tradicional pa asina no evita nos di atende partonan” Maria Luvia Hernandez, di e pueblo indigena tojolabal y integrante di movemento Parteras de Chiapas a bisa. E tin 15 aña den defensa di e conocemento ancestral hereda for di su welo.
Durante centenares di aña, e partera tradicional ta compaña e muhe indigena den e proceso di parto. Pero pa nan, semper ta dificil pa institucionnan estatal reconoce y apoya nan conocemento y competencia.
“Ta un constante lucha pa institucionnan manera e Secretaria di Salud y Instituto Mexicano di Seguro Social (IMSS) reconoce nos trabou como partera. Pa otronan, e institucionnan ta bay mas leu ainda, ora nan a purba di pone e parteranan tradicional disparce”, el a lamenta.
E di cinco encuentro estatal di parteranan a desaroya na Chiapas dia 2 di october pasa y tabatin como obhetivo maximo defende y promove e parto tradicional. Tambe pa brinda e muhenan e oportunidad di recorda e importancia di nan papel na un estado unda e cifra di mortalidad durante e parto ta esun di mas halto na Mexico. Esaki ta debi pa falta di atencion pa e muhenan durante servicio medico.
