Mexico ta aparce na Latino America y Caribe como e pais cu tin e cifranan mas halto entre personanan infecta pa Covid-19, segun un estudio presenta pa Revista Pan Americano di Salud Publico, di Pan American Health Organization (PAHO).
E obhetivo di e investigacion tabata analisa e evolucion di e pandemia Covid-19 y e capacidad di contesta na paisnan di Latino America y Caribe, durante e prome 90 dia di epidemia (desde e prome caso confirma na cada pais) y su asociacion cu variabel cu tin relacion cu medidanan di salud publico y caracteristicanan demografico, sanitario y social.
E cifra di mortalidad mayor na Mexico a keda identifica cu 11%, despues Ecuador cu 8.6% y Brasil cu 6.2%, e cifranan menor a wordo observa na Venezuela cu 0.8% y Costa Rica 0.9%. E cifra promedio tabata di 3.4%.
Aunke e estudio ta splica cu si ta analisa e cifra di tendencia acumula di casonan positivo, esun di mortalidad y cantidad di pruebanan haci pa poblacion pa confirma infeccion, por mira cu tin paisnan como Chile y Panama cu un cifra di incidencia di casonan halto na 90 dia, pero cu mortalidad abou, loke por splica e cantidad mayor di prueba realisa pa miyon di habitante na e pais ey.
Un mortalidad mayor tambe por tin relacion cu e disponibilidad di recursonan di salud pa enfrenta e pandemia, e sistemanan aki cu recursonan di infrastructura y recursonan humano menor lo por tin un number di mortonan mayor, y viceversa.
