Congreso di estado di Oaxaca a aproba e legalisacion di interupcion boluntario di embaraso te cu 12 siman di gestacion, den cualkier circunstancia.
E decision historico a conta cu apoyo di 24 di e 36 legislado, kendenan a sigura cu e medida ta busca garantisa e derechonan di hende muhe pa bida y salud.
E sesion a conta cu e participacion di activista na fabor y den contra di aborto. E defensor a sigura cu ta trata di un prome paso cu ta duna speransa pa e muhenan di otro region di e pais.
“E triunfo no ta pa Oaxaca so, e ley si, pero esaki ta duna speransa pa otro estadonan unda ta castiga e hendenan muhe ora nan ta dicidi interumpi e embaraso legalmente”, Pilar Muriedas, activista di ‘Consorcio Oaxaca’ a sigura.
Pa e opositornan, no a scucha e bos di pueblo. Estefania Richi, vocero di ‘Grupo ProVida’ a afirma cu ‘no a studia suficientemente y ta un arbitrariedad. Nos tin representante cu no ta scucha nos y cu nan no tin conocemento di loke nan ta haci’.
Prome, estado di Oaxaca tabata permiti solamente e interupcion boluntario den caso di violacion, mal formacion di feto, riesgo pa bida di e mama y inseminacion artificial sin autorisacion.
E decision historico ta haci cu estado aki lo converti den di dos entidad di e pais cu ta permiti e aborto na cualkier condicion te cu 12 siman, despues cu Ciudad di Mexico a adopta e medida na 2007. Desde e momento ey, ta calcula cu 209,000 muhe a practica aborto ilegal na capital Mexicano.
