Gobierno di Mexico a descarta ayera diamars cu lo suspende e vuelonan for di Reino Uni pa motibo cu ta considera cu e variante di coronavirus nobo cu a wordo detecta ya lo a extende caba na “hopi pais” y tambe pasobra no ta representa “un menasa adicional” pa salubridad publico.
“Organisacion Mundial di Salud (OMS) no ta conseha e ciere di vuelonan for di Reino Uni pasobra no tin evidencia cu esaki ta representa un menasa adicional pa salud publico”, e sub-secretario di Salud y strategia di gobierno contra coronavirus, Hugo Lopez-Gatell a expresa den un conferencia di prensa.
Asina mes, e epidemiologo a defende cu “ceramento di vuelonan for di Reino Uni no lo tin un contribucion pa reduci e riesgo” ya cu e variante di coronavirus posiblemente ya caba “a expande rond di mundo”.
Desde comienso di pandemia, Mexico ta un di e poco pais na region cu no a adopta restriccionnan aereo pa detene e contagio ni a aplica medidanan pa aisla e poblacion.
OMS a bisa cu no ta existi evidencia cu e nobo variante di coronavirus identifica na Reino Uni lo causa un infeccion mas grave of cu ta afecta e eficacia di e pruebanan diagnostico y vacunanan disponibel, aunke a admiti cu ta parce di trata di un mutacion hopi mas contagioso.
E situacion aki a causa cu un dozijn di pais a dicidi di suspende temporalmente su conexionnan cu areanan di Reino Uni, cu e fin di detene e plamamento di e nobo cepa di e virus.
Na America, e ceramento di vuelonan a wordo adopta pa Argentina, Chile, Colombia, Republica Dominicana y Canada, den tanto Peru a uni pero a bay mas leu, a dicidi di extende e suspension “preventivo” di vuelonan pa tur Europa, por lo menos den proximo dos siman.
