(EFE) – Organisacionnan di sociedad civil na Mexico ayera dialuna a presenta un iniciativa pa e creacion di un Ley General di Cancer, cu lo yuda soluciona e falta di politica publico enfoca den atencion integral di e malesa aki na e pais.
“E ley ta un instrumento huridico cu lo duna seguridad y garantia na personanan cu un manera structura, eynan e importancia di dje”, Kenji Lopez presidente di Cancer Warriors di Mexico y consehero di hunta directiva di Union Internacional pa Control di Cancer (UICC) a bisa den un conferencia di prensa.
E mas di 13 asociacion cu ta haci impulso di e iniciativa aki dialuna ultimo a reuni cu legisladonan Mexicano pa conforma e Comision di Trabou di Sociedad Civil cu ta busca diseña e proposicion y percura pa cu Congreso Mexicano por aproba e ley aki.
Di acuerdo cu Lopez, cancer ta e di tres causa di fayecimento pa malesa na Mexico y su atencion ta ocasiona gastonan halto pa sistema di salud y pa famianan.
Segun e activista, na 2021 so a registra poco mas di 44.000 morto pa e causa aki, ademas, entre 70% y 80% di e casonan registra ta wordo detecta den etapanan avansa, loke ta influencia den indice di mortalidad halto.
Lopez a afirma cu e mal maneho di sistema di salud Mexicano y falta di politica pa atencion, ademas di falta di inversion pa medicamentonan, ta causa cu personanan cu cancer ta wordo diagnostica hopi laat y cu 60% di nan ta muri.
Ademas di esey, e falta di presupuesto tambe ta un problema, pa motibo cu hermentnan como Registro Nacional di Cancer no a wordo concretisa.
Lopez a lamenta cu te awor na Mexico no por tin un Ley General di Cancer pa tur e poblacion, aunke si ta existi otro norma pa deteccion oportuno pa cancer pa muchanan y hobennan.
E ley ta ki segun el a sigura ta inspira den legislacion similar como esun cu ta existi na paisnan como Uruguay, Chile, Colombia y Merca cu ta conta cu un legislacion for di 50 aña caba.
