Entre e luna di october te luna di maart, e detencion di famianan migrante na e frontera sur cu Merca a aumenta te 375% compara cu e mesun lunanan di aña 2018. Autoridadnan Mericano a señala esaki ora gobierno di Donald Trump a anuncia e decision di apela e blokeo di politica di manda e solicitantenan di asilo bek na Mexico, pa nan warda e resolucion di nan proceso den e pais ey.
Di su banda, e Cas Blanco a argumenta na su apelacion cu ‘e fluho di migrante ilegal ta collapse nos sistema di migracion y ta abruma nos pais’ tambe a keha cu ‘un corte so, unilateral, ta suspende e ley di migracion di henter un nacion, y ta crea un crisis sin precedente na nos frontera sur’.
Sinembargo, e decision di e corte ta suspende e uzo di politica conoci como Quedate en Mexico, ‘cu ta parti di un programa di cooperacion extenso di negociacion cu Gobierno di Mexico’.
Mientras tanto, e autoridadnan di Mexico ta rechasa cu nan a bay di acuerdo pa manda e resto di e migrante bek, sinembargo, nan ta afirma cu nan ta acepta e migrante pa motibo di e politica humanitario.
E Oficina di Aduana y Proteccion di Frontera (CBP), a indica cu maart tabata e luna cu mayor cantidad di migrante aresta durante e ultimo 5 aña, loke ta haci un total di 92.607 aresto ‘entre e puesto di entrada di e frontera sur, den comparacion cu 66.884 na februari’, loke ta representa un aumento di 35% den un luna.
