Miles di persona a marcha na Ciudad de Mexico contra e aborto cu ta legalisa na capital, manifestando pa tur persona tin derecho di biba desde concepcion te e morto natural.
Bou e lema “Uni pa bida”, e marcha organisa pa e plataforma Paso pa Bida y integra pa famianan, legislado, organisacion civil y grupo religioso, a inicia na e Monumento pa Mama, simbolico pa e ocasion, y a conclui dilanti di e Congreso di e Ciudad de Mexico.
Desde e sitio legislativo unda a despenalisa aborto na Ciudad de Mexico, diputado di varios partido politico a haci un pronunciamento en contra di e interupcion di embaraso.
E legisladonan a exigi e retiro di 24 iniciativa cu ta existi na diferente congreso di e pais, y cu lo promove e leynan dedica pa protege bida.
Aunke e interupcion di embaraso ta legal na e capital Mexicano desde 2007, no tur e estadonan tin e mesun ley. Aborto ta un procedemento hopi restringi den e mayoria di e entidad Mexicano, cu a ser hiba di manera clandestino. Guanajuato y Queretaro ta conta cu un legislacion mas estricto, incluso den e caso di violacion.
E alerta ambiental cu e capital tabatin pa contaminacion, no a detene e miles di protestante cu a sali riba caya, aunke e autoridadnan a recomenda cu na e mesun siman no por haci actividadnan pafo, pa e calidad di aire malo. E emergencia ey a ser suspendi e dia anterior pa via di e mehoracion di dispersion di e contaminante.
Presidente Andres Manuel Lopez Obrador a manifesta su mes na fabor di realisa un posibel consulta popular tocante aborto legal, pero e tema aki no tin apoyo ni den su mesun partido Morena, generando diferente postura riba e interupcion legal di e embaraso.
