Un scandal cu a sacudi e opinion publico Mericano y a menasa e politica duro di migracion di Presidente Trump: E separacion di muchanan for di mayornan na frontera sur. Aunke ta existi un ordo di Hues for di aña pasa, e practica ta sigui, asina Union Americano di Libertad Civil (ACLU) a bisa.
Den un documento hudicial cu e organisacion civil a presenta na Corte di San Diego, ta calcula cu Immigration and Customs Enforcement (lesa: Guarda Nos Costa) a separa 911 mucha di nan famia, aunke un Hues a emiti un ordo di restriccion riba e practica aki.
Segun ACLU, Gobierno di Merca ta utilisando varios excuus: E afiliacion supuesto cu gangnan, inkietud riba siguridad di muchanan, enfermedad di e mayornan y un ‘relacion di famia no verifica’. E parti mas grave ta, segun e denuncia di e organisacion, cu cada cinco mucha separa, tin menos di cinco aña di edad.
E scandal ta conoci ya caba for di luna di mei di aña pasa, ora e administracion di Trump a reconoce cu a perde bista di 1.500 mucha indocumenta. Den e ola di critica, e mandatario a bisa cu lo rectifica e politica. E denuncia ultimo di ACLU a señala cu e practica, denuncia pa e organismonan internacional di derechonan humano, ta persisti.
ACLU a pidi pa Hues determina si tin hustificacion pa e casi 1.000 separacion cu a sosode entre 28 di juni di 2018 y 29 di juni di 2019 di e aña aki.
