(UnivisionNoticias) – Entre luna di augustus y october 2017 a reporta na Mexico 1.411 desaparicion, ekivalente na un cada 93.8 minuut, di acuerdo cu e ultimo cifranan oficial di e registro nacional di persona perdi of desapareci (RNPED). Un calculo cu ta supera e promedio registra den e seis añanan di gobierno di presidente Peña Nieto, cu ta di un persona perdi cada 126 minuut.

Ta trata pa prome biaha di cifra di e casonan nobo hinca den RNPED, danki na un plataforma di e organisacion no gubernamental Data Civico, cu a logra identifica e nombernan di e personanan desapareci cu a drenta den e plataforma oficial di gobierno.

En total, te ultimo dia october pasa, RNPED tabatin registra 33.125 caso di persona reporta como desapareci of perdi, registra na nivel local, y 1.145 nan nivel federal, un total di 34.270 caso.

No obstante, data civico a alerta cu den e ultimo database emiti pa gobierno a haci un ahust’e den nan cifranan y por lo menos 1.316 caso a wordo elimina. Aunke autoridadnan no a duna un splicacion pa e reahustacion, varios medio local ta bisa cu ta trata di e curpanan cu a keda descubri den tumbanan clandestino durante aña pasa.

En total, di 1.411 desaparicion reporta den tres luna, 65% di e denuncianan a ser haci den cinco estado. Estado di Mexico a registra 440, Sinaloa 205, Puebla 150, Guerrero 105 y Nuevo León 71. Sinembargo, analisando e cantidad di caso pa cada 100.000 habitante, e estadonan cu  ta resalta ta Sinaloa, Nayarit, Colima, Guerrero y Queretaro.

Na november pasa, Data Civica a recopila den un database e identidad di 31.968 persona desapareci, cu diferente na e database publico oficial, tabata inclui e nomber di e personanan.

E iniciativa denomina #PersonasNoRenglones a revisa miles di database oficial y a compara nan cu e desaparicionnan den tur estado. Como resultado a obtene e datonan personal di mas di 30.000 persona desapareci den e pais. Otro 308 persona a keda sin identidad pa falta di informacion.

Desde 2013 ta existi na Mexico e registro nacional di persona perdi o desapareci (RNPED), un database di persona perdi administra pa gobierno. Sinembargo, e nombernan di e personanan den e registro no ta publico y e casonan ta identifica solamente pa e number di file.