Ciudadanonan y organisacionnan social na Culiacan, capital di estado di Sinaloa, a marcha contra violencia despues di enfrentamento entre forsa federal y crimen organisa durante e operativo di captura y posterior liberacion di Ovidio Guzmán, yiu di e lider narcotraficante Joaquín ‘El Chapo’ Guzmán.
E manifestacion a enfoca riba e hechonan registra 17 di october pasa, yama ‘jueves negro’ na capital di Sinaloa. E dia ey, e habitantenan a biba varios ora di panico, angustia y temor ora, den un operativo cu a faya y tabata mal organisa segun e mesun autoridadnan Mexicano a reconoce, e militarnan a trata di captura Ovidio Guzman.
E accionnan aki a ocasiona un serie di accionnan di parti di integrantenan di e grupo criminal narcotraficante, como blokeo na careteranan principal di Culiacan y enfrentamento entre forsa di siguridad y sicarionan di e Cartel di Sinaloa, cu a causa e liberacion di e yiu di ‘El Chapo’ di parti di autoridadnan Mexicano.
E mobilisacion, yama ‘Culiacan Valiente’, a cuminsa na parkeerplaats di stadion di e ekipo local di futbol Dorados de Sinaloa, unda centenares di ciudadano a concentra cu pañanan blanco y nan a toca musica di banda.
Famianan completo, hendenan grandi, hobennan, muchanan a reclama e paz y trankilidad pa estado di Sinaloa, nan a cana te yega na Parke Las Riberas. Algun di nan a realisa e recorido cu bais y patineta.
Di su parti, Secretaria di Siguridad Publica estatal a informa cu e number di fayecido pa e tiroteo durante e operativo a aumenta te 14 y tabata 21 persona herida durante e caos di e dia ey na Culiacan.
