Presidente di Mexico, Andres Manuel Lopez Obrador, a bisa ayera den rueda di prensa cu su gobierno ‘no lo ta complice di ningun hende’ refiriendo na e detencion di ex-secretario (‘ministro’; red.) Genaro Garcia Luna na Merca, pero a comenta cu no mester expresa huicio di antemano tocante eventual implicacion di ex-presidente Felipe Calderon.
“Loke ya ta conoci ta bastante fuerte, ta e mesun huzgado cu a trata e caso di Guzman Loera, no ta algo cu a surgi na ultimo momento, ya nan tabatin tempo ta haci investigacion. No ta anticipa nada tocante su implicacion (di Felipe Calderon) pero nos lo no defend’e tampoco pasobra nos lo ta complice di corupcion,” e mandatario Mexicano a declara.
Lopez Obrador a informa cu e Unidad di Inteligencia Financiero (UIF) di Gobierno Federal lo aporta tur informacion disponible tocante e ex-ministro di Seguridad Publico, deteni na Merca pa presunto lazonan cu narcotrafico.
“Nos ta bay yuda den tur cos cu nos por den e investigacion. Tur cos cu Fiscalia General ta pidi bao di e entendimento cu ta trata di un organismo autonomo. Tur cos cu nan pidi, sigur di movemento di placa, bienes, inteligenca financiero.”
Pa loke ta e cuestionamento di su gobierno cu lo ta realisando un investigacion contra Felipe Calderon, deriva di e detencion di Garcia Luna, debi cu tabata durante su administracion cu Garcia tabata ministro di Seguridad Publico, el a splica:
“Mi no kier pa hende pensa cu nos ta probecha di e circunstancianan pa ataca Calderon, a pesar di e daño cu el a haci, no na ami so, sino na e pais (…). Sin embargo, nos no tin enemigo, ni nos kier tin, nos tin adversario, y nos no ta desea malo pa ningun hende.”
