(EFE) – Presidente di Mexico, Andres Manuel Lopez Obrador, ayera diabierna a considera cu Merca no ta bay concretisa e ampliacion di e muraya na frontera cu su pais, aunke Administracion di Joe Biden a anuncia a ampliacion di 36 kilometer debi na orden di Congreso Mericano.
“Nan no ta bay construi e 36 kilometer y nan no kier haci’e, esey ta loke nan a expresa nos, nan kier cumpli cu ley, pero nan no ta di acuerdo cu e construccion di murayanan, esey no ta resolve nada. Ta un medida, mas cu nada publicitario.” E mandatario a bisa den un conferencia di prensa na Cancun.
Lopez Obrador a expresa su inconformidad pa muraya nobo aki, cu ta bay tuma luga na valle di Rio Grande di Texas, durante e Dialogo di Nivel Halto tocante Siguridad entre Mexico y Merca, di e cual e delegacion tabata lidera pa secretario di Estado di Merca, Antony Blinken.
Den e reunion, a bisa cu autoridadnan Mexicano a plantia na funcionarionan Mericano cu e muraya no ta e solucion pa e tema migratorio, pasobra prome mester atende e causanan y garantisa na e paisnan oportunidadnan di desaroyo y trabou.
El a reitera e reconocemento na Biden, na ken a bisa cu “te awor ta e unico presidente” cu no a construi murayanan, aunke a señala cu e construccion di e 36 kilometer aki ta debi na un autorisacion di presupuesto di Merca y ta e oposicion di e pais ey cu ta pidi pa haci esey.
El a recorda cu entre Mexico y Merca, tin 3.180 kilometer di frontera y hopi presidente Mericano a purba construi murayanan pa evita e entrada di migrantenan na teritorio aki.
“Nan a cuminsa haci e muraya 40 aña pasa y apenas nan tin como 1.200 kilometer, ki dia nan ta bay caba? Ta puro publicidad,” Lopez Obrador a bisa.
