E presidente di Mexico, Andrés Manuel López Obrador, tabatin un interaccion nobo cu controversia cu e periodistanan cu ta cubri su conferencia di prensa cada mainta, ora el a destaca cu e comunicadornan ta ‘prudente’ y cu ‘si boso haci di mas, ya boso sa kico lo bay pasa’.
Despues el a agrega: “No ta ami, ta e hende, no ta cu mi, ta cu e ciudadanonan, cu ya nan no ta ciudadanonan imaginario, tin hopi inteligencia den nos pueblo, antes tabata menosprecia hende”, tambe a bisa. “Mi tin hopi confiansa pa e ciudadanonan, mi ta kere den pueblo. Na final di cuenta, e ciudadanonan ta esunnan cu ta pone cada ken na su luga”, el a reflexiona.
Diabierna pasa, e Presidente di Mexico a ser confronta pa e periodista di Univision, Jorge Ramos, pa motibo di e diferencia entre ambos tocante e cifra di homicidio y libertad di expresion na e pais.
López Obrador a señala den conferencia ey cu den e prome 90 dia di su gobierno, a registra 8.524 homicidio doloso, pa cual e periodista a sigura cu 2019 ta parce cu lo ta e aña mas violento den historia di e pais, pa loke e mandatario a contesta cu ‘nos a mantene e nivel cu tabata existi anteriorment, of e tendencia cu nos tabatin a reverti riba e delito di homicidio’.
Mexico ta considera como un di e paisnan mas peligroso pa eherce periodismo. Al menos 140 periodista a ser asesina entre e 2000 y 2018, di acuerdo cu cifranan di Comision Nacional di Derechonan Humano Mexicano.
