Gobierno Mexicano a bisa ayera cu lo autorisa , “pa motibo humanitario y di manera temporal”, e entrada di cierto stranhero cu ta bin di Merca, despues cu e pais bisiña a informa di nan plan di manda e migrantenan di regreso pa Mexico, mientras nan ta tramita nan pedido di asilo.
E ministerio (Secretaria) di Relacionnan Exterior Mexicano a agrega den un comunicado cu lo permiti e entrada di stranhero cu a drenta Merca via un puerto di entrada, cu nan a keda aresta na un puerto di entrada of cu nan a haya un cita pa presenta dilanti di un hues di migracion di Merca.
“Mexico ta reafirma su derecho soberano di admiti of rechasa e entrada di stranhero den su teritorio, den ehercicio di su politica di migracion,” e canciyeria Mexicano a bisa.
“Gobierno di Mexico a dicidi di tuma e accionnan na beneficio di e persona migrante, en particular e menor di edad, como tambe pa protege e derecho di esunnan cu ta desea di inicia y sigui un procedemento di asilo den teritorio di Merca,” el a agrega.
Entre october y november, miles di Centroamericano a trata di scapa di pobresa y violencia na nan cas y a crusa Mexico den varios grupo rumbo pa Merca. Segun gobierno Mexicano, casi 100.000 persona a integra e caravananan di migrante.
Varios mil di nan ta ainda den parti nort di Mexico y ta warda pa por crusa frontera pa Merca. Otro a regresa pa nan pais di origen y algun di nan no tabatin suerte y a perde nan bida, manera ta sucede cada aña.
