(BBC) – Un grupo di migrante Latino Americano cu ta na sur di Mexico a cose nan boca diamars ultimo den protesta pa no ricibi nan documentonan cu ta permiti pa nan keda na e pais of pa cruc’e ,y asina nan yega na frontera cu Merca.
E migrantenan – principalmente di centro y sur America, y tambe di Haiti – ta pega na e ciudad sur di Tapachula, na estado di Chiapas, frontera cu Guatemala, na espera pa autoridadnan procesa nan solicitud di asilo y visa humanitario.
Hopi di nan tin lunanan ta warda pa e documentonan.
Un dozijn di nan, pa laga evidencia di e situacion desesperante, a acudi na e portanan di Sub-direccion di Regulacion Migratorio Zona Sur a cose nan boca cu hangua y hilonan.
E activista Irineo Mujica den un video a señala cu nan ta haci e accionnan aki pa exigi un trato mas humano y pa acelera e tramite migratorio.
E cantidad di persona cu ta solicita status di refugiado of asilo na Mexico a duplica desde 2019, alcansando un maximo di 131.448 solicitud na 2021, segun datonan oficial.
Varios di e migrantenan a keha di e condicionnan cu nan ta biba. Hopi di nan ta biba na parke y cayanan y nan ta depende di asistencia humanitario durante e espera.
E principal centro di migracion di Mexico ta na Tapachula, na unda ta procesa aproximadamente 70% di e solicitudnan di asilo.
A traves di un comunicado publica diaranson ultimo, Instituto Nacional di Migracion (INM) a rechasa e accionnan cu migrantenan ta haci cu lo por afecta nan salud fisico y mental.
Di su parti, e manifestantenan a sigura cu nan no ta busca confrontacionnan sino solamente documentonan pa nan por continua caminda pa Merca.
E mayoria di e migrantenan a sali for di nan pais pa pobresa, violencia y desasternan natural.
Segun un calculo di Medico Sin Frontera di september di 2021, Tapachula na e momento ey tabata collapse caba.
