(CNN) – Gobernador di Sinaloa, Ruben Rocha Moya, ayera diahuebs a anuncia e suspension di scol den tur nivel den cinco municipio di su estado, entre nan e capital, Culiacan y e fiestanan di Independencia di 15 di september pa via di aumento di violencia.
“Mi ta informa e comunidad di Sinaloa, cu ta keda suspendi actividadnan escolar na municipionan di Culiacan, Elota, Cosala y San Ignacio, e dia di awe 12 di september 2024, den tur nivel y modalidad educativo,” Rocha Moya a skirbi riba red social “X.”
Rocha Moya tambe a suspende e fiestanan pa e ‘Grito di 15 di september’ na Sinaloa, y a adverti cu lo por presenta enfrentamentonan entre gruponan criminal na e estado.”
“Nos a resolbe cu e festeho di grito di 15 di september ta bay keda suspendi. No lo tin festeho, ni publico ni priva,” el a anuncia riba un video publica na “X.”
Ademas, a bisa cu a tuma e medida preventivo di suspende scolnan te proximo diamars 17 di september na cinco municipio di Sinaloa.
Di su parti, presidente di Mexico, Andres Manuel Lopez Obrador, ayera tambe a bisa cu su Gobierno ta conta cu “presencia fuerte pa garantisa paz y trankilidad” na Sinaloa y tambe a sigura cu violencia ta responde na enfrentamentonan “entre dos grupo.”
Diaranson ultimo, Rocha Moya a bisa cu “tabata probabel” cu “nos lo tin eventonan di presencia di gruponan arma” den un mensahe riba X.
Den e mensahe e gobernador a señala cu: “Nos lo ta den e foco di violencia cu lo presenta, na momento cu ta. P’esey mi kier manifesta na poblacion cu pa ta responsabel, nos tin cu admiti cu lo por sigui presenta e eventonan di violencia aki.”
Tambe e gobernador a bisa cu a yega “cuatro avion tipo Texas, helicopternan y 100 elemento di forsa special” manda pa gobierno di Lopez Obrador pa disminui e violencia.
Dialuna ultimo, un persona a muri y dos militar a resulta herido durante enfrentamentonan entre hendenan civil arma na estado ubica na noordwest di Mexico. Incluso violencia a obliga suspende scolnan na dos ciudad.
Universidad Autonomo di Sinaloa a anuncia e mesun dia ey cu como medida “preventivo” lo convoca studiantenan di manera virtual pa haya les den tur nivel. E universidad aki tin 5.333 alumno, di acuerdo cu cifranan oficial di 2018.
