Mexico: Gobernador di Chihuahua boycotea pa actua contra corupcion

(Infobae) – E gobernador di e estado Mexicano di Chihuahua, Javier Corral, di e opositor Partido Acción Nacional (PAN), a denuncia dialuna pasa cu gobierno federal a nenga di duna recurso presupuestal den un supuesto represalia pa a persigui funcionarionan acusa di corupcion. Corral ta bisa cu gobierno federal a keda sin duna estado Chihuahua 700 miyon peso (36,4 miyon dollar) y cu e propio secretario 9ministro) di Finanzas, José Antonio González, lo a bisa den un reunion cu e motibo lo tabata un investigacion contra miembronan di partido PRI, cu ta goberna na nivel federal, acusa di corupcion.

“Pa via di e investigacion nan no a deposita, y e motibo tabata e desaroyo di e investigacion aki, cu ta siguiendo su curso entre e instancianan hudicial en busca di combati e corupcion politico,” Corral a declara den rueda di prensa. Gobierno di Chihuahua ta investiga e desvio di recursonan publico pa campaña politico den tres estado, na fabor di candidatonan di Partido Revolucionario Institucional (PRI), tempo cu e estado tabata goberna pa César Duarte, di PRI y riba ken tin orden di captura internacional pa corupcion.Gobierno di Chihuahua a revela dia 20 di december di aña pasa un caso di corupcion cu ta involucra e ex-secretario general adhunto di PRI, Alejandro Gutiérrez, cu ta acusa di desvia 250 miyon peso (13 miyon dollar) di recurso publico pa campaña di su partido.

Corral a declara cu un hues di Chihuahua a ordena prison preventivo pa Gutiérrez pa delito di enrikesimento di fondo publico. Corral a declara cu e acusacion ta cu Gutiérrez ‘a participa den un plan elabora di simulacion di contrato di prestacion di servicio profesional , cu nunca a ser haci y cu a permiti sustrae recursonan publico, pa uso den metanan partidista’.“Nos no ta bay negocia e investigacion aki, ni pa 700 miyon, ni pa henter e presupuesto di Chihuahua,” Corral a señala respecto e represalia financiero y e caso di corupcion, pa cual husticia di Chihuahua ya a emiti 10 orden di captura contra su antecesor, César Duarte, di PRI, cu ta como profugo na Merca. Posteriormente ministerio di Finanzas a informa, cu henter e presupuesto di estado Chihahua a keda transferi, incluyendo e partinan reclama pa e gobernador.