(AP) — Merca a logra aresta e narcotraficante mas busca di Mexico, pero fiscalnan Mexicano – y e presidente – awo ta bisa cu nan ta considerando presenta cargonan di traicion contra esnan cu a entreg’e.

Esaki ta parti di e caminda largo y straño di lider di cartel di Sinaloa, Ismael “El Mayo” Zambada, kende inesperadamente a aparece riba un vuelo cu a aterisa cerca di El Paso, Texas na juli. E vuelo di avion priva aki tabata organisa pa otro capo di droga cu a dicidi di entrega su mes.

Oficialnan Mericano ta bisa cu Joaquin Guzman Lopez – yiu di lider di cartel Joaquin “El Chapo” Guzman, kende ta den prison – a bula na Merca pa entrega su mes, pero a secuestra Zambada prome cu bandona Mexico y a fors’e pa subi e avion.

Pero na lugar di gradici Merca pa atrapa Zambada – kende su cartel a plama violencia y teror na Mexico pa decadas – fiscalnan Mexicano ta considerando presenta cargonan di traicion contra Guzman of cualkier otro persona involucra den e plan.

Oficina di Procurador General Mexicano a bisa diadomingo laat cu a habri un investigacion criminal “pa e posible crimen di fuga ilegal, uso ilicito di aeropuerto, violacion di ley di migracion y aduana, secuestro, traicion contra e patria y cualkier otro cu resulta aplicable.”

E respuesta straño pa e captura di e narcotraficante cu tabatin un recompensa di $15 miyon riba su cabes ta basa riba un articulo den codigo penal Mexicano cu ta pone sentencia di prison di hasta 40 aña pa traicion. E articulo ta inclui e definicionnan tradicional di traicion – ataca Mexico den nomber di un poder stranhero of sirbi den un ehercito stranhero –pero tambe ta declara cu traicion ta cometi “pa esnan cu ilegalmente ta secuestra un persona na Mexico pa asina entrega nan na autoridadnan di otro pais.”

E clausula aki aparentemente tabata motiva pa e secuestro di un dokter Mexicano busca pa supuestamente participa den e tortura y asesinato na 1985 di agente di DEA, Kiki Camarena. E dokter, Humberto Machain, a ser secuestra na Mexico an 1990 y entrega na autoridadnan Mericano, generando rabia na Mexico.

Pa largo, presidente Andres Manuel Lopez Obrador ta mira cualkier intervencion Mericano como un reto, y a nenga di confronta cartelnan di droga Mexicano. De hecho, dialuna el a bisa cu el a cuestiona e politica Mericano di detene lidernan di cartelnan di droga, puntrando “pakico nan no ta cambia e politica ey?”

Contestando tocante e caso di Zambada – y e posible participacion di un politico lider di partido Morena di Lopez Obrador den negociacionnan cu e narcotraficantenan – e presidente a pinta henter e cuenta como un posible plan di Merca pa atacha su persona door di vincula su partido cu narcotraficantenan.

“Na Merca, tin algun grupo cu no kier compronde cu cos a cambia, y cu kier keda interveni, mina, purba di domina,” e presidente a bisa.

Durante weekend, abogado di Zambada a publica un carta di su cliente bisando cu el a ser embosca y secuestra ora el a kere cu e ta bay reuni cu gobernador di estado di Sinaloa, y despues a hib’e contra su boluntad na Merca. Den e carta di dos pagina, Zambada a bisa cu Guzman Lopez a pidie pa atende un reunion dia 25 di juli cu politiconan local, incluyendo gobernador di Sinaloa, Ruben Rocha Moya, di partido gobernante Morena. Pero e carta a bisa cu na lugar di esey a hib’e na un camber unda a mand’e fo’i tino, a tapa su cabes, pon’e na boei y despues a hib’e riba un pickup na un strip di aterisahe unda a fors’e subi un avion priva cu finalmente a hiba e y Guzman Lopez na tera Mericano.

E carta a expresa pregunta tocante vinculo entre traficantenan di droga y algun politico na Sinaloa, pero gobernador Rocha Moya a rechasa cualkier vinculo cu e criminalnan, bisando cu e no tabata na Sinaloa e dia ey. Despues di e arestonan, el a bisa cu e tabata na Los Angeles.

Oficina di Procurador General a bisa cu a tuma e caso for di fiscalnan estatal di Sinaloa.