Tabata dia 20 di januari ultimo, cu un celebracion a bria un emergencia na San Juan del Rio, comunidad di municipio Santiago Choapam, na zona nort di e pais.
Pa e pueblo aki di 200 mil habitante, Dia di Reyes tabata e comienso di un brote di Covid-19 cu a laga 12 morto, 14 persona hospitalisa y 400 contagio, segun autoridadnan municipal.
5 di januari, e poblacion a lanta e medidanan sanitario y a celebra e Divino Niño Jesus na e ritmo di musica di e banda Costa Brava di Veracruz. Manera a wordo haci cada aña, cu centenares di persona sin tapa bocas ni distancia.
E prome muestra cu e localidad tabata enfrenta un brote di e virus a aparece despues di e aplicacion di e prueba pa 30 persona, 10 di nan a sali positivo. Incluyendo personal medico di e centro di salud cu mester a wordo aisla. Loke a sigui despues tabata di miedo, pero no resignacion.
Di acuerdo cu un carta dirigi pa presidente Andres Manuel Lopez Obrador y gobernador Alejandro Murat, e dia 28 di januari Everisto Gamboa, consejal di Choapam, a adverti cu su comunidad tabata enfrenta e situacion aki sin personal medico ni medicina, y cu e poblacion tabata cera den nan cas y cuminda a cuminsa bira escaso.
Pa via di esaki, el a pidi mil vacuna, personal medico, tanki di oxigeno, tapa bocas, desinfectante, ekipo di proteccion, brigada pa tuma e muestranan y alimento.
Di acuerdo cu Servicio di Salud di Oaxaca, e solicitud di ayudo a wordo atendi casi di forma paralelo; a wordo mobilisa un brigada di dos medico y dos enfermero cu e yegada di ekipo di proteccion y sanitisacion.
Juan Carlos Márquez Heine, secretario di Salud estatal a splica cu loke a sucede na Choapam ta e resultado di e fiestanan di Fin di Aña y Reyes, cu a satura e sistema di salud, cu a pasa di tin 280 persona hospitalisa na mita di december, pa 450 na final di januari.
