Segun informe di gobierno di Mexico, mas di 250 persona a keda deteni despues di e disturbionan cu a tuma lugar entre otro na Ciudad de Mexico. Esaki despues cu a anuncia un aumento fuerte di prijs di gasolin. E protestanan a termina den sakeo di varios tienda. A anuncia tambe cu banda di e arestonan haci, lo tuma mas medida pa contraresta e tipo di acto di vandalism aki. Na Ciudad di Mexico ta trata di 64 persona aresta y di 23 tienda cu a keda sakea. Tambe tabatin incidente similar na estadonan Mexico y Hidalgo.
E protestanan a cuminsa despues du gobierno a impone entrante 1 di januari un aumento di prijs di combustible cu por yega hasta na aumento di 20%. E atakenan tabata dirigi tambe contra varios establecimento di compania estatal petrolero PEMEX.
Den un mensahe na e medionan di comunicacion e subsecretario di Gobierno, René Juárez, a splica cu e sucedido ta “acto na margen di ley, cu no tin nada di haci cu un manifestacion pacifico, ni cu e derecho di libre expresion cu tur Mexicano tin”.
Juárez a haci “un firme yamado pa evita acto di vandalismo y di violencia cu no ta beneficia ningun hende y cu solamente ta perhudica sociedad, pasobra aunke ta trata di hecho cu ta toca un cantidad chikito di municipuio, nan ta causando daño na propiedad di otro persona”, ela argumenta.
