E asesinato di e reportero Jorge Celestino Ruiz, diabierna pasa anochi, ta enfatisa e situacion dificil den cual prensa Mexicano mester haci nan trabao. E mesun siman a caba dos otro periodista mata, y sede di un redaccion ataca cu bom di candela, sumando 11 periodista victima caba e aña aki.
Segun agencia AFP, organisacionnan manera Reporteros Sin Fronteras (RSF) a señala e pais como un di esunnan mas peligroso pa eherce e profesion, cu mas di 100 periodista mata desde aña 2000.
Ruiz, coresponsal di e corant Grafico de Xalapa, a muri di tiro na municipio Actopan, den region central di estado Veracruz , segun confirmacion di Alcalde Paulino Dominguez.
Fiscal estatal, Jorge Winckler, a confirma e inicio di un investigacion di e asesinato di e periodista kende tabatin medida di proteccion vigente pa e mes y su famia, debi na menasa cu el a ricibi pa su trabao.
Un fuente policial, cu a pidi pa keda anonimo, a bisa AFP cu e cas di Ruiz a ser ataca cu tiro na october aña pasa. Coleganan a bisa cu, despues di e denuncia, Ruiz no tabata firma su articulonan mas pa keda ‘low profile’ mirando e riesgonan.
Veracruz ta un estado problematico pa e presencia di gruponan di crimen organisa dedica na narcotrafico y otro delito. Contando te siman pasa, 22 periodista asesina, segun datonan di ombudsman Mexicano, e Comision Nacional di Derecho Humano (CNDH). E lista ta sigui cu Guerrero cu 17 caso, Oaxaca y Tamaulipas cu 16 cada uno, y Chihuahua cu 14.
