E spiraal inflacionario na Mexico ta continua creciendo y ta parce di no tin fin. E pais a registra na luna di maart un aumento di 5,35% di nivel di prijs, e nivel mas halto den ultimo ocho aña.

Desde cu e aña a cuminsa, e economia di hogarnan tabata domina pa e liberalisacion di prijs di gasolin y di gas pa uzo domestico. E cambionan den e indice Nacional di Prijs pa Consumidor, publica siman pasa pa e Instituto Nacional di Estadística y Geografia (Inegi), ta lidera pa e incremento di 20% den prijs di gasolin y 35% di gas domestico, registra den prome parti di aña.

Sin embargo, ambos componente ta cay levemente pa loke ta luna di maart compara cu e mesun luna aña pasa. Esaki danki na prijs mas abao riba mercado internacional. Di acuerdo cu Inegi, e indice di prijs a registra un crecemento mensual di 0,61% na maart, un aumento importante compara cu e 0,15% anota den e mesun luna di aña pasa. E grupo di producto cu a reporta un incremento mayor anual tabata esun energetico, cu un aumento di 17% anual pa e liberalisacion menciona di prijs.

E aumento di gasolin, yama popularmente gasolinazo, a provoca protesta den henter e pais desde cu a anuncia esaki na fin di aña pasa. Confronta cu e peligro di un spiraal inflacionario, gobierno a priminti di vigila e comerciantenan pa evita “aumento inhustifica” den e productonan di e canasta basico. Sin embargo, algun zona di e pais a reporta incremento importante di alimento diario manera tortilla.

Especialistanan den economia consulta pa banco central a aumenta nan proyeccionnan di inflacion pa 2017, desde cu a anuncia e gasolinazo. Den e ultimo encuesta haci na februari, e economistanan ta anticipa cu e aña aki e aumento di prijs lo yega na un 5,56%, mientras cu prome cu e gasolinazo e expectativa tabata di 4% anual, dentro di e rango estableci pa e instituto emisor. Sin embargo, na tres luna di aña ya a alcansa e nivel di inflacion aki.

Aunke bastante halto caba, e tasa di inflacion actual ta leu di yega na e cifranan di final di añanan ochenta, tempo cu e cambionan di aña pa aña tabata di tres cifra. Tambe e halsa registra den e ‘tequilazo’, e crisis cu a sacudi Mexico meymey di añanan nobenta, tempo cu e canasta basico di consumo a dispara mas di 50% entre aña.