“Si bo ta keda den e rancho nos ta bolbe haci mesun cos cu bo. Si bo keda, nos ta bay come bo yiu muhe bibo”, Rosa ta conta (nomber ficticio), di 61 aña, indigena Tepehuana, originario di Durango. Cuatro aña pasa e mester a huy di e rancho den cual e tabata biba, bay ciudad cu su dos yiunan, despues di keda deteni ora el a intenta paga e placa di rescate pa su yiu mayor, cu e no a mira mas y pa ken el a entrega 500.000 peso na un grupo perteneciente na ‘Los Zetas’.

Manera e, tin mas di 300.000 persona na Mexico cu a mira nan mes forsa pa bandona nan lugar di origen, pa motibo di e violencia generalisa na e pais aki. E enfrentamentonan entre e forzanan arma y e crimen organisa durante periodonan largo, e proliferacion di gruponan delictivo, e lucha entre e cartelnan pa e rutanan di distribucion di droga, e violacionnan di derechonan humano, e corupcion y e impunidad den e municipionan tabata e principal causa di e desplasamento interno.

Entre januari 2016 y januari 2017 por lo menos 21.031 persona mester a huy di nan estado di origen, bandona nan lugar di residencia temporal o permanentemente, cu e intencion di salvaguardia nan bida. Menasa pa crimen organisa, o pa e operativonan di seguridad di ehercito y marina, e mas di 20.000 personanan aki ta forma parti di un lista cu no a stop di crece desde cu e guera contra narcotrafico a cuminsa bao di gobierno di Felipe Calderon (2006 – 2012).

E desplazadonan  forsa ta e cara invisible di un exodo cu ta tuma lugar den por lo menos 12 di e 32 estadonan di e pais y cu dificilmente ta hayanan den e estadisticanan y den medio di comunicacion. Den cierto ocasion e mobilisacion ta masal di famia completo cu ta bandona nan lugar di biba, y na otro momento ta trata di huida individual. Periodista, activista, estudiante, medico, profesional y empresario mediano ta esnan mas menasa.

“Por ehemplo, na 2015, na Sinaloa a registra desplazamento masivo pa actuacion di ehercito en busca di Chapo Guzman y su familiarnan”, Brenda Pérez, coordinadora di area di desplazamento di e Comision Mexicano di Defensa y Promocion di Derecho Humano na Mexico (CMDPDH), ta bisa.

Segun e ultimo informe di e comision, 310.527 persona como minimo, a keda desplaza forsosamente desde 2009. Den e ultimo aña so, a registra 29 episodio di desplazamento interno masivo  na nivel nacional. Durante ultimo aña, Michoacán tabata e estado cu mas poblacion desplaza. Por lo menos 10.000 persona a bandona e region di  ‘Tierra caliente’ na 2016. Ta sigui  Sinaloa cu 4.200 persona, Chihuahua cu 4.700 y Guerrero, cu a expulsa 1.600 y cu a registra cantidad mayor di desplazamento den comunidadnan. Entre e estadonan mas conflictivo tambe tin Veracruz, Durango, Tamaulipas y Chiapas.