(EFE) – Gruponan criminal ta usando AI (Inteligencia Artificial) pa manipula potret y asina kita sumanan grandi di placa for di famianan cu desesperadamente ta busca nan sernan keri, migrantenan indocumenta cu a perde na frontera entre Mexico y Merca.

Un di e casonan ta trata di e ruman di Norma Ramos, un persona cu dos luna pasa a purba di drenta Merca di manera iregular pa busca trabao, y a desaparece.

Ultimo noticia cu su famia a haya di dje ta cu e Mexicano di 30 aña a ser “laga” probablemente na desierto di Arizona.

E famia a tuma contacto cu Consulado di Mexico y patruya Fronteriso, pero e entidadnan aki no a haya ni un informacion di e persona aki, ni sikiera registronan cu el a keda deteni.

Den nan desesperacion, e famia a bay busca riba rednan social, na unda nan a haya un pagina cu supuestamente por a yuda nan.

Ramos a manda informacion di su ruman cu varios potret, y mesora el a cuminsa ricibi mensahe. “Mi a haya un mensahe di un muhe yama Lorena sigurando cu el a caba di papia cu mi ruman, el a duna mi un number di telefon y a bisa mi pa yama nan pa nan duna mi mas informacion,” Ramos a bisa.

Ora el a yama, e persona cu a atende telefon a bis’e “cu efectivamente nan tabatin mi ruman y cu nos mester paga 10.000 dollar pa su liberacion.”

El a cuminsa haya mensahe cu potretnan supuestamente di su ruman pidiendo ayudo. Pero cu ayudo di expertonan por a logra descubri cu e potretnan tabata falso, igual cu e video cu nan a manda. Un di e potret cu Ramos a manda a ser usa pa genera imagennan.

Tur cos tabata un gañamento di supuesto secuestradonan, cu utilisando inteligencia artificial, ta copia e cara di un persona y nan ta subi e potret di un curpa di otro hende pa haya potret y video.

Un fuente di Oficina di Aduana y Proteccion Fronteriso (CBP) a bisa cu e agencia ta al tanto di e practica aki y cu ta investigando e casonan.

El a splica cu constantemente ta surgiendo paginanan di delincuentenan cu supuestamente kier yuda famianan busca nan sernan keri y nan ta haya informacion di rednan social pa cuminsa cu e extorsion.

A recomenda famianan “pa wak bon” e potret y video pa haya nan fout: por ehemplo, un persona secuestra no por tin un cara trankil of cu harimento den e potretnan.