Tur dia, den compartimento secreto di auto y scondi den truck di carga, centenares di pistola y arma di asalto y hasta metrayador ta crusa frontera ilegalmente di Merca pa Mexico.
Secretaria (ministerio) di Defensa Nacional di Mexico a afirma cu cada aña ta drenta e pais mas di 200.000 arma di tur tipo. Como promedio 567 pa dia, como 22 cada ora.
E mayoria ta cumpra legalmente den negoshi situa na California, Arizona, New Mexico y Texas, di acuerdo cu Agencia di Alcohol, Tabaco, Arma di Candela y Explosivo (ATF pa su abreviacion na Ingles) di Merca.
E metodo pa haya esakinan ta e asina yama “trafico di fruminga” unda centenares di persona ta cumpra un o varios arma cu despues nan ta entrega na gruponan cu ta manda nan pa Mexico.
E cumpradornan ta ciudadano Mericano sin antecedente hudicial, manera acusacion di a comete delito, o sin problema di stabilidad mental. Esakinan ta conoci como e “cumpradornan fake”. Tambe ta frecuente compra via internet. Den esey ta dificil pa aplica revision di antecedente na e cumpradornan.
Pero e forma di compra di e cartelnan di droga ta diferente den e sentido cu nan ta reuni arsenal di arma den teritorio Mericano y despues ta manda nan pa Mexico den compartimento secreto den truck di carga. Esakinan ta logra crusa frontera, pa un parti pa e corupcion di autoridadnan aduanero y di migracion, pero tambe pa menasa di e mesun delincuencia organisa.
Otro metodo identifica ta e tunnelnan construi den e ciudadnan na frontera. Di acuerdo cu e investigador Luis Astorga, e rutanan di trafico di arma ta e mesunnan di droga y placa.
