Presidente di Merca, Joe Biden, ayera diahuebs a elimina e declaracion di emergencia nacional na frontera cu Mexico imponi pa Donald Trump.
Den un carta e mandatario Mericano a anula e medida decreta na februari di 2019 pa su antecesor, Donald Trump, pa asina por haya fondonan pa paga e construccion di e muraya na frontera cu Mexico, ya cu esey “no tabatin garantia”.
“Mi a determina cu e declaracion di emergencia nacional na nos frontera sur no tabatin hustificacion. Tambe mi a anuncia cu lo ta politico di mi Administracion pa no lo desvia mas dollar di e contribuyentenan Mericano pa construi un muraya fronteriso, y cu mi ta dirigiendo un revision cuidadoso di tur e recurso asigna y dirigi pa e fin aki”.
“Cu e presente mi ta informa Congreso cu emergencia nacional cu a wordo declara pa e proclamacion 9844 y cu a continua dia 13 di februari di 2020 y 15 di januari di 2021, a duna por termina y cu autoridadnan regarda den esaki no lo wordo utilisa pa construi un muraya na frontera sur” e carta cu a wordo manda pa Congreso ta bisa.
E construccion di e muraya fronteriso tabata un di e promesanan grandi di Trump prome cu e lo a yega na Cas Blanco, y despues na e poder, el a insisti cu e iniciativa controversial aki, pa e cual el a priminti cu Mexico lo tin cu paga. E ex-presidente a aplica un politica di tolerancia cero na frontera.
Den cambio, Biden a defende e revision di fondonan di politica di migracion pa garantisa un enfoke mas humano, loke awor, den espera di aplicacion practico, a bale aplausonan di organisacionnan defensor di Derechonan Humano. E actual administracion a suspende acuerdonan cu tabata facilita e deportacion pa El Salvador, Guatemala y Honduras.
