(Newsweek) – Diahuebs ultimo, polis di Ciudad de Mexico (CDMX) a haya un red dedica na extorsion y fraude, despues di un operativo unda nan a revisa 12 edificio y a detene 24 persona, cinco di origen Asiatico, di acuerdo cu e titular di Secretaria di Seguridad Ciudadano (SSC), Omar Garcia Harfuch.
Den un conferencia di prensa, a informa cu ta trata di un organisacion cu influencia na China, Spaña y Colombia. A traves di app di telefon nan tabata otorga credito di manera ilegal y cu interesnan hopi halto. E operativo a wordo realisa na cuater alcaldia: Benito Juarez, Cuauhtemoc, Iztapalapa y Coyoacan.
Igualmente, Hefe di Gobierno, Claudia Sheinbaum a bisa cu for di cuater luna pasa a presenta denuncia di personanan cu tabata download un app na nan telefon. Di loke ta trata e investigacion, a bisa cu ta cuater compania (call center) cu tin relacion cu prestamo cu aplicacionnan: Flamingo Cash Águila Desierto México, Okrédito, Kampala y Listobuy.
Aunke e centronan di extorsion ta ubica na CDMX, algun di nan tabata opera na otro estadonan como Sinaloa, Puebla, Jalisco, Baja California, Nuevo León, Estado de México, Hidalgo y Querétaro.
Autoridadnan di Ciudad di Mexico a detene 27 persona durante un operativo na un call center, presuntamente specialisa den delitonan di extorsion y cobransa ilegitimo, ora nan tabata otorga credito di manera ilegal, entre e detenidonan ta dos muhe stranhero.
E grupo aki tabatin e nomber di “montadeuda”, cundo tabata opera duna credito a traves di app di telefon, pa despues cobra interes imposibel di paga mediante menasa y extorsion.
Den tanto, sub-secretario di Seguridad Federal, Ricardo Mejia, a recorda cu te 8 di augustus ultimo tabatin 350 file di investigacion habri na diferente fiscalia, den relacion cu e aplicacionnan aki.
